Shillong, Lber 09 : Ka Sorkar Jylla kala bthah ia baroh ki Deputy Commissioner kynthup ka West Garo Hills- ba kin pynlong ia ka jingialang peace-committee bad ki nongialam shnong bad ban kyntu ha kaban long ba jai jai hadien ka jingiakhih kaba khang ia u MLA barim ban thep kyrteng kum u kyrtong sha ka elekshon Garo Hills Autonomous District Council (GHADC), ka ban long la 10 tarik Iaiong
U Commissioner & Secretary ba khmih ia ka tnad Pohiing bad District Council Affairs (DCA) Cyril Diengdoh ula pyntip ba ka Sorkar kala phah biang ia ki bor pahara ban pahara ha ri-lum Garo khnang ban pynthikna ba ka elekshon GHADC kan iaid beit iaid ryntih.
“Phi lah iohsngew ia ka jingjia mynta ka sngi. Kumta, ngi lah shong jingialang bishar kam bad baroh ki DC kynthup u DC ka Tura. Ngi lah bthah ia u DC ban khot ia baroh ki jaidbynriew bad ban lum ia ka jingialang peace-committee bad ban kyntu ban wanrah ia ka jingsuk. Ia kine ki jingbthah lah dep ban ai” iathuh u Bah Cyril sha ki nongthoh khubor.
U pyntip ba u Superintendent of Police ka West Garo Hills ula pan shuh shuh ia ki bor Pulit bad ka jingpynbeit kala iaid shakhmat. “Yn sap hah shuh shuh ia ki bor pahara” ula kular.
U Commissioner & Secretary ula pynthikna ia ka khubor kam bymman bala mudui halor ka jingjia hynne ka step.
“Uwei na ki kyrtong ula leit ban thep kyrteng….ha ka por kumba 10 baje mynstep…bad une u briew ula shah khang” ula ong haba pyntip ba u DC ula ai ia ka kaiphod ia kaei kaba jia.
Haba kylli halor ka hukum ka GHADC ba pynlong kongsan ba ki kyrtong ki dei ban don ia ka Scheduled Tribe Certificate, u bah Cyril ula ong, kane ka kynrum kynram kala leit mynta sha ka Iingkashari High Court bad ka Sorkar kan ap ia ka rai.
Ka jingiathep kyrteng ki kyrtong kala sdang ha ka sngi Nyngkong (10 baje mynstep haduh 3 baje janmiet) bad kan kut ha ka 16 tarik Lber. Ka jingbishar kyrteng kan long ha ka 17 tarik Lber.
Ym shym la don satia ki kyrtong kiba thep kyrteng ha ka sngi Nyngkong.
, ka ban long la 10 tarik Iaiong){kind=link}