Shillong, Lber 09 : Ka State Nodal Officer for Census Dr Pooja Pandey kala pyniaid ia ka jingialang ban shong bishar kam halor ka jingpynkhreh ia ka jinglum khana samari 2027.
Kane ka jinglum jingkhein dalade kan sdang naduh ka 1-15 Jymmang bad ka jingleit shim jingkhein na man ki thliew iing kan sdang naduh 16 Jymmang haduh 14 tarik Jylliew.
Ka jingialang-kaba shong bishar ia ka jinglum samari ha ki kor digital bala pynjlan naduh u snem 2021, la wan iashimbynta da ki Deputy Commissioner bad Principal Census Officer jong ki District bad ki Nongtrei ka Directorate of Census Operation.
U Joint Director Subhasish Chatterjee ula ai ka jingbatai ba bniah sha ki nongiashimbynta halor ka por bala buh ban lum khana samari, ki jinghikai ba donkam bad ki bynta jong ki tnad bapher bapher.
Ka Pandey kala ong ba ka jinglum khana samari ka dei ka kam ba radbah kaba pyndon bynta ia ki nongtrei ha ki kyrdan bapher bapher bad ban jur ba “ka jingiatreilang hapdeng broh ki kynhun kan long kaba donkam bha” ban lah pyndep ia ka jinglum khana samari ha kine ki ar kylla.
Ia ka jinglum jingkhein na ki thliew iing la pynbna da ka Tnad General Administration bad kan sa mih ha ka Gazette ka Meghalaya.
Ka jingpynkhreh ia ka jingai jinghikai ia ki nongleit lum khana samari ha ki kyrdan bapher bapher ruh lah iakren ha kane ka jingialang.
