Shillong, Nailar 31 : U MLA ka UDP na Mawsynram Bah Olan Sing Suin, ula niew kum ka ‘khubor thok’ halor ka jingkam ba 9 na ki 12 ngut ki MLA ka UDP ki don jingthmu ban leit iasoh noh sha ka Bharatiya Janata Party (BJP).
Haba kynthoh halor ki jingmih khubor ha ka sngi Nyngkong, u bah Suin ula ong “Ngam don jingtip eiei ia kata. Nangno phi ia ioh ia kata ka khubor? Hadien ka Dorbar Synrai, nga la leit sha Shnong bad nga dang wan phai hynnin ka sngi”.
Ula bynrap ‘Lada ka kyrteng jong nga ruh ka don, balei phi kylli ia nga?. Nga dang shu wan mynnin na Lawbah. Ka dei ka khubor thok. Phin sa duh noh ia ka jingshaniah. Nga tharai phi ia kwah ban ia thaw khubor hi dalade”.
Halor ka jingialang ba dang shen hapdeng ki MLA ka UDP bad u Myntri kam Pohiing ka Ri Amit Shah, u bah Suin ula pynshai “Hooid, ngi la iakynduh ia u Amit Shah la shibnai mynta ban iakren ia ki kam ba iadei bad ka Jylla. Hadien kane ngi la don ka Dorbar Synrai bad ngi khlem iakynduh shuh. Hadien ka Dorbar Synrai, Nga la leit sha Shnong”.
Haba batai ia ka jingleit Delhi, u bah Suin ula ong “Ngi don ia ka hok ban iakynduh ia ki nongialam ka Sorkar Pdeng ha ka riti synshar paidbah. Ngim dei ban shaniah tang ha u Myntri Rangbah ka Jylla. Na ka party, ngi don ia ka hok ban leit bad kylli balei kine ki kam ki sahteng”.
Haba kyntait ia ki khana khlieng tyngab ba don ka jigniashrut bad jingbym shaniah shuh ia u Preident ka UDP Bah Metbah Lyngdoh, u Bah Suin ula ong “Balei ba ngin ym shaniah shuh ia u President?. Mano ban long President nalor u bah Metbah?. Kane ka dei ka sain pyrthei, ki jingantad kan mih beit, hynrei shimet hi nga don ha ka jingshaniah ba pura ha u. Ngam iohi ban dang don kiba kham tbit ban ia u ban ialam ia ka party”.
“Ka don tang kawei ka kynhun ha ka UDP, ba ialam da u Bah Metbah Lyngdoh. Ngam tip ia kano kano ka kynhun thymmai. Mano ba ialam ia kane ka kynhun, hato dei u Bah Olan Sing Suin” ula buh jingkylli.
.){kind=link}