Shillong, Rymphang 26: U Myntri Rangbah ka Jylla Conrad K Sangma ha ka sngi Palei, u la tyrwa ban pynlong ïa ki jingaihikai ba kyrpang ha ki ktien trai ri na ka bynta ki nongthaw aiñ, haba ai jingmut ba ki MLA na ri-lum Garo kin hikai ïa ka ktien Khasi bad kiba na ri-lum Khasi-Jaiñtia kin hikai ïa ka ktien Garo ban long ka nuksa ïa ki nongshong shnong hapdeng ka jingpyrshang jong ka sorkar ban pynthikna ia ka jingnang ia ki ktien trai ri ha ka thungkam Sorkar.
Haba jubab ha Iingdorbar Thaw Ain, u Conrad ula ong “Kan long kaba itynnad lada ngi don ia ka jingshim klas ia kiMLA-ka jingai jinghikai ba 10 lane 15 sngi-ha kaba ki MLA na ri-lum Garo kin hikai ban nang ia ka ktien Khasi bad kito kiba na ri-lum Khasi- Jaintia kin nangia ka ktien Garo. Kane kan phah ia ka khubor kaba bha….ba ngi la ialam hi nakhmat”.
Ka jingkren u CM kala mih haba jubab ia u MLA ka TMC Dr Mizanur Kazi, uba la pynpaw ia ka jing sngewkhia halor ka rai ba dang shen jong ka Sorkar ban pynlong kongsan ha kaban nang kren ia ka ktien Khasi bad Garo ha ka thungkam ki District Selection Committee (DSC).
U Kazi ula ong ba ka policy ka lah ban ktah ia ki samla ba khlem kam ha ki jaka them jong ka ri-lum Garo namar ki jingai jinghikai ia ki ktien trai ri ka tlot bha, bad kyrpad ia ka Sorkar ban ai ia ki jaka ai jinghikai bad ka por pynkhreh kaba biang.
U Myntri Rangbah ula pynshai ba kane ka sienjam kam dei kaba thmu ban kyntait iano iano.
“Nga pynthikna ia baroh ki dkhot ba ia kane la leh da ka jingthmu ba kino kino kiba iakhun ia ka kam Sorkar, ki dei ban nang ban kren ia ka ktien trai ri. Kam dei ka sobjek kaba eh-hynrei donkam tang ka jingiakren” ula ong.
U Conrad ula ban jur ba donkam tang ban nang kren ym ka thoh ka tar.
“Lada kim nang ban kren Garo ne Khasi, kan ktah ia ka jingai jingshakri jong ki namar kin hap ban iakren iakhana bad ki trai shnong. Kane kam mut ban pynduh iano iano, hynrei ban pynthikna ba kin nang ia ka ktien ba kin iakren iakhana bad ki briew ba ki ai ka jingshakri”.
Ula bynrap ba bun ki nongshongshnong ha ki jaka them ka ri-lum Garo ki dei kiba nang ban kren Garo. “Nga don bun ki paralok ha Selsella bad ki jaka them, bad baroh na ki, ki kren Garo. Kumta, kam don jingeh satia” ula ong.
U Conrad ula kdew ruh ia ka rai ba dang shen jong ka Kynhun Myntri ba pynlong kongsan ban pule ia ka ktien Khasi bad Garo ha ki skul Primary bad ia ki kot la nang pynkhreh mynta.
“Ngi sngew sarong bha iala ka jong ka ktien. Da kane ka jingthmu, ngi la wanrah ia kane ka policy….hynrei ki briew kim dei ban khuslai satia…..” ula ong.
