Shillong, Rymphang 6 : Ka Jylla kala khreh ban sakhi ia ka jingkiew ba khraw ha ka jingkynshew kam ki riew shimet, bad ka Sorkar ka khmih lynti ia ka jingwan tuid ka pisa ba T.5600 klur ha ki snem ban wan, pynbna u Myntri Rangbah ka Jylla Conrad K Sangma ha Iingdorbar Thaw Ain ha ka sngi Balang.
“Ngi khmih lynti sa T.2638 klur ban sa shim rai shen. Hapoh kine ki arsnem ban wan, ngin ioh jan T.5600 klur ka jingkynshew kam ha Jylla, ia kaba ngi khmih ba kan plie ia ka lad aikam aijam haduh 5500, bad bun na ki, kin dei ha ka jingpdiang ia ki briew ba nabar (hospitality)” ong u Conrad haba jubab ia ki jingiatai halor ka mang tyngka ha Iingdorbar Thaw Ain.
U Myntri Rangbah ula pynpaw ia ka jinglah ka Jylla ban kyntiew ialade ha ka kam thung siej, haba pyntip ia ka jingwad bniah bala leh da ka MBMA.
“Ka MBMA kala pynlong ia ka jingwad bniah halor ka kam thung siej kiba don ha Meghalaya. Haba ki pule ia ka kaiphod, kila kmen bha namar ki jait siej ba ki wad ki dei kiba shem ha Meghalaya bad kane kan plie ia ka lad kynshew kam ba jan kot T.2000 klur hangne” ula ong.
U Conrad ula bynrap ba ka Sorkar ka dang shu sdang ruh ban iakren bad ki nongkynshew kam kiba lah ban seng kam, ka ban nang plie lad shuh shuh ia ki nongrep trai shnong.
