Shillong, Rymphang 25 : Ka Sorkar Jylla kala treikam bha ha ka liang ka koit ka khiah, da kaba tei haduh 51 tylli ki Health Centre bad kyntiew kyrdan ia 554 tylli kiwei ha ki phra snem bala leit noh, pynbna u Myntri Rangbah Conrad K Sangma ha ka sngi Balang.
“Ngi la kynshew shibun bha ha ka liang ka koit ka khiah” ong u Conrad haba jubab ia ka jingiatai halor ka mang tyngka ha Iingdorbar Thaw Ain.
“Ngi la bynrap sa 772 tylli ki jingthiah, 479 ngut ki specialist bad ki doktor la thung lyngba ka MMSRB, 76 ngut ki doktor la ai jinghikai ba kin long ki specialist bad 6700 tylli ki Village Health Council kila treikam” ula ong.
U Myntri Rangbah ula kubur pat ba wat hapdeng kane ka jingiaid ki kam, ki dang don shibun kiei kiei kiba hap ban leh khamtam ha ka Safe Motherhood Programme.
“Ki dang don shibun kiba ngi hap ban leh bad ngi la pynleit jingmut ia kine mynta” ula ong.
