Shillong, Nailur 23 : U Director General of Police (DGP) Dr LR Bishnoi ula hukum ban pynkhlain ia ki phatok ha ka Jylla khnang ban lah tehlakam ia ka jingphet tuh ki koidi lashai hadien habud.
“Nga la kyntu ia u IG (Prison) ban leit jurip ia baroh ki phatok bad ban aiti ia ka kaiphod kumno ban pynkhlain ia ki phatok. Hadien kane, ngin sa iashong lang bad iashim rai” ong u Dr Bishnoi haba iakren bad ki nongthoh khubor.
Ha ka 10 tarik Nailur, hynriew ngut ki koidi kila phet tuh na Jowai District Jail, West Jaintia Hills hadien ka jingthombor ia ki nongtrei jong kane ka phatok.
Hynrei, saw ngut napdeng kine, kila shah bom iap ha ki paidbah hajan ka shnong Shangpung katba arngut pat la ioh ban kem da ka jingiarap jong ki paidbah nongshongshnong.
Haba kylli, u DGP ula pyntip ba ula dep phah ia ka kynhun ki Heh Pulit ban leit jurip ia ka Jowai Jail.
“Ha kane ka jingjurip, kila shem ba bun na ki CCTV kim shym la treikam satia bad ngi la pynkhlain ia ki bor pahara khang ba kin lah pahara ia kiba bun ki jaka miet la bad sngi” ula ong haba bynrap “Ngi la ai jingmut ia ki bor pyniaid ia ki phatok ba kin pyndait ia ki jingtbeh jingshai ha kiba bun ki jaka. Ngi la shem ruh ia ka jingiadonkti jong ki nongtrei ka phatok bad ki Pulit ka District kila ioh ia ki sakhi ha kaba kila kem ia saw ngut bad la phah ia ki mynta sha ka Judicial Custody. Ka jingtohkit ia kanem, ka dang iaid shakhmat”.
Halor ka jingjia bom shnong, u DGP ula ong ba ki Pulit kila register ia ka suo moto case pyrshah ia ki briew ki bym lah satia ban ithuh.
