Shillong, Nailur 23: Ka Tnad Pulit ka Jylla kala ioh ban kurup ia u droks ba shongdor palat T. 18.33 klur bad kem haduh 134 ngut ki nongkhaii tang ha kine ki saw bnai bala leit noh.
“Ngi la hiar thma pyrshah ia u droks ha baroh ki jaka ka Jylla. Tang ha kine ki saw bnai (Jylliew haduh Nailar) ngi la ioh kurup ia u droks ba palat T. 18.33 klur. Kane ka dei ka jingkurup kaba heh bha bad ka burom ka leit sha ki Pulit ka Jylla, ka kynhun Anti Narcotics Task Force (ANTF) bad ki Special Branch kiba ioh lum kloi ia ki jingtip” ong u Director General of Police (DGP) Dr LR Bishnoi haba iakren bad ki nongthoh khubor hynne ka sngi thohdieng.
Kine ki kynthup ia 3.62 kgs heroin, 4,500 kgs ganja, 150 grams opium, 145 bitor ka dawai jyrhoh, bad 11,902 ki dawai amphetamines. Nalor kine, la ioh kurup ia 31 tylli ki kali kynthup ia 4 ki trok, 90 tylli ki mobile phones, kawei ka pistol bad katto katne ki kuli lem bad ka pisa ba T.24.22 lak.
Tang ha kine ki arsngi, ki Pulit ka East Khasi Hills kila ioh ban kurup jan 400 gram u heroin, 2 tylli ki thuk thuk, kawei ka kali bad ka pisa ba kot T. 5.5 lak.
Une u Khliehduh ki Pulit u pyntip ba ki Pulit kila ioh kem haduh 134 ngut ki nongkhaii droks na ki 48 tylli ki case bala register. Napdeng kine, 123 ngut ki dei na Meghalaya bad 11 ngut ki dei kiba na Assam, Manipur bad Arunachal Pradesh, kaba pyni ba ki nongkhaii droks ki dei ki runar ba iakhleh jylla. Kumjuh ruh 125 ngut ki dei ki shynrang bad 9 ngut ki dei ki Kynthei.
Une u Heh Pulit u pyntip ba bun na ki kam khaii droks kila jia ha ki 8 na ki 12 tylli ki District ka Jylla bad kine ki kynthup ia ka East Khasi Hills, West Khasi Hills, South West Khasi Hills, South West Khasi Hills, East Jaintia bad West Jaintia Hills, Ri Bhoi, West Garo Hills bad South Garo Hills.
“Na ki 48 tylli ki case, 50% ki dei kiba la register ha East Khasi Hills bad kaba bud ka dei ka West Garo Hills, nangta ka Khliehriat ha East Jaintia Hills, Ri-Bhoi bad ka West Jaintia Hills” ula ong.
Ki saw district ki bym pat don kawei ruh ka case bala register hapoh ka NDPS ka dei ka Eastern West Khasi Hills, East Garo Hills, North Garo Hills bad South West Garo Hills.
“18 na ki 76 tylli ki Police Station ki dei kiba jur eh ka jingregister ia ki Case ka NDPS Act. Namar kata, ngi la pynleit jingmut ha kine ki 18 tylli ki thanad ban ioh kyndang ia ka lynti shalan jong ki nongkhaii droks” ong une u Heh Pulit.
Ha kajuh ka por u pyntip ba ki Pulit ka Jylla kila pynlong ruh ia ka jingkhynra kaba jur pyrshah ia ki nongtuh thuk thuk na Tura bad Shillong.
Ha kine ki saw bnai, ki Pulit kila ioh ban kurup biang haduh 141 tylli ki thuk thuk bad ioh kem haduh 61 ngut ki nongtuh bad la register haduh 90 tylli ki case pyrshah ia ki.
