Nongpoh, Nailur 23: Ka Hill State Peoples Party (HSPDP)- Umsning Constituency ka la nang ioh bor kum ka jingpynkhreh ia ka election 2023 da ka jingwan pyniasoh ki nongïalam ka National People’s Party (NPP) sha ka HSPDP ban kyrshan ïa u Bah Primson Makdoh kum u kyrtong na Umsning Constituency.
Kine ki heh nongïalam ba pynïasoh sha ka HSPDP ki dei kiba la ialam da u Bah Tarson Nongkseh kum u Working President ka NPP na Umsning Constituency, u Bah S.P Nongbet, Treasurer, u Bah Donbor Marbaniang, Organizing Secretary bad u Samla Ribok Kharprah kum u President ka NPP Youth Wing na Umsning Constituency.
Ïa kine ki nongïalam la pdiang burom u President ka HSPDP Bah P.K Pangniang ha ryngkat ka jingdon lang u Senior Vice President uba dei u MDC ka Mawkynrew Bah Martel Mukhim, u District President ka HSPDP na Ri Bhoi Bah P.B Sylliang, u kyrtong ka HSPDP Umsning Bah Primson Makdoh bad kiwei kiwei.
Ki Nongialam ka HSPDP kila ai ka jingpynshai halor ka nongrim treikam jong ka party bad ka nongrim ba kan mih sha ka elekshon MLA-2023.
Ha kane ka sngi, la plie paidbah ruh ïa ka ophis treikam ka HSPDP ha Palm Hotel bad kumjuh ruh la pynlait paidbah ïa ka jingrwai election ka party ban kyrshan ïa U Bah Primson Makdoh kum u kyrtong ka HSPDP na Umsning Constituency.
