Tura, Nailur 23 : U Myntri Rangbah ka Jylla Conrad K Sangma ula kular ia ki paidbah ka thain Tikrikilla ba ka Sorkar Jylla kan ym kyndang shuh ia ki briew ba sah ha ka jaka sorkar bala tip kum ka B Mahal ha ka thain bad mynta ka dang pynkreh ban ithuh noh ia ki ban long ki Nongshongshnong ba kin lah ban pynneh ia ki iing ki sem.
U Myntri Rangbah ula pyntip ia kane hakhmat u paidbah ha ka jingleit iuhkjat jong u hynne ka sngi thohdieng ha Tikrikilla.
“Ki khubor ba ong ba ki nongshongshnong kin sa shah kyndang na katei ka jaka ba kila sah la bun snem, ka dei tang ka buit politics jong ka Liang Pyrshah bad ki Nongialam namar ka elekshon kala don hakhmut. Ym don mano mano ruh ki ban shah pynkynriah” pynshai u Conrad ha ka jingialang paidbah haba plie ia ka Iingskul jong ka Pedaldoba GIA Secondary School.
U Conrad ula ai nuksa ia ki jaka sorkar kum ha Balsrigittim bad Warima kaba don ha Williamnagar ha kaba ki briew kila kyntur bad shna iing shna sem la bun snem hynrei ka Sorkar kam shym la kyndang shuh ia ki pynban kala iasoi da ka jingiateh kular ban shu shim noh da ka baiwai ka ban ai jingmyntoi ia kine ki briew bad ruh ia ka Sorkar.
“U MLA ka Williamnagar ula kren ia kane ka kam bad kine ki briew ba sah ha ki jaka sorkar. Kumta, ngi la rai ban pynthikna ba baroh arliang kin myntoi lyngba ka jingiapynbeit ka ban iamynjur lang da baroh” ong u Myntri Rangbah.
“Ban pynthikna ia ki jaka ba don ka jingkyntur ha B-Maham bad ban ithuh ia ki jaka ba lait thylli bad ki jaka bala kyntur n aka liang ka Assam, ka sorkar kala pynlong ia ka sor jamin. Hynrei ka Liang Pyrshah kala pynsaphriang ia ka khubor lamler ba ka dei kaba la leh ban kyndang ia baroh ki briew. Kane ka dei ka buit jong ka Liang pyrshah” ong u Conrad.
Kat kum ka jingong jong u, ka Sorkar ha ryngkat bad ka GHADC kin sa ithuh ia ki jaka kiba la kyntur pud da ka Assam bad kin sa shim ia ki sienjam ban iada ia kine ki jaka puta.
“Ia kito ki jaka ba dang lait bad kiba la kyntur da ka Assam, ngi don jingthmu ban tuklar bad ban iada da kaba buh ia ki project ki ban ai jingmyntoi ia ki trai shnong lyngba ka ioh kam iohjam bad kiwei kiwei” ong u Conrad.
Haba pynpaw ba ka jingiapynbeit kan long ruh ia ki jaka sorkar ha Tura, u Conrad ula pynbna ba kitp ki jaka ha Tura kiba la kyntur pud da ki briew la bun bun snem ruh kan don noh da ka jingiapynbeit ka ban ai jingmyntoi ia kine ki briew bad ruh ia ka Sorkar Jylla.
“Kumba ngi la iapynbeit ha Williamnagar, ngin sa sdang ruh ia ka kam ha B-Maham. Ngin sa leit ruh kumjuh ia ki jaka sorkar bala kyntur ha Tura. Ngi la dep iakren bad ka GHADC haba iadei bad ki jaka ha Tura” pynshai u Myntri Rangbah.
