Shillong, Rymphang 17 : U Myntri Rangbah ka Jylla Conrad K Sangma ula niew ia ka sor New Shillong kum ka engine pynroi bad ka nongaikam kaba bun eh, haba pynpaw ba kan plie ka lad ia jan baroh ki longiing bad ka imlang sahlang ha ka Jylla.
Haba jubab ia ka jingiatai ha Iingdorbar Thaw Ain ha ka sngi Ba-ar, u Conrad ula ong “Ia ka New Shillong la tei kum ka engine pynroi ka Meghalaya-bala pynieng ha ki saw tylli ki paia : ka tourism, sports& culture, education & skilling bad technology. Ryngkat lang, kine ki tnad kin khring ia ki karkhana thymmai, thaw ia ki lad thymmai, bad pynmih palat 1.5 lak ki kam, ka ban pynlong ia ka New Shillong kum ka jaka pdeng ba shisnem ha ka jingiohkam ki samla jong ngi”.
Haba pyntip ia ka jingiaid jong ki kam haduh mynta, u Myntri Rangbah ula ong “Ki kam kila iaid bha ha ka jingtei ia ka sor New Shillong”.
Phase-1, ka Administrative City, ka ban don ki Ophis treikam ba kongsan kum ka Meghalaya Secretariat, ka IIM Shillong, NIFT, NEIAH bad NEIGRIHMS, ka ban pynlong ia ka knowledge bad Healthcare hub.
Ka project Meghalaya Secretariat ba T.1,231 klur kala dep kumba 35%, bad ka Legislative Assembly Building kala jan dep artad, ong u Conrad.
Ka thain kan sa nang kylla ruh kum ka jaka iathied iapet lyngba ka Unity Mall (dep 40%) bad ki surok ban don ki dukan kiba la plan bha.
U Conrad ula iathuh ba haduh 64.9 acre ka jala la buh ban shna ia ki jaka pule higher education bad skilling bad ka IT Park kala lah ban pynmih haduh 1500 tylli ki kam.
Ka plan shna iing ka kynthup ia 51.68 are ban tei ia ki iingsah, bad 10.9 acre ia ki iingsah kiba jem dor (435 unit).
Phase-2, ka Knowledge City ha Mawkhanu, kan don ia ka IT park kaba heh, ka Skill & Innovation Hub, ka Monolith Tower bad ka Football Stadium ba don 40,000 ki jaka shong.
“Kine ki jingtei kin thaw ia ka ioh ka kot ba thymmai bad kin pynmih ia ki kam ki jam” ong u Conrad.
Ka projek ka buh hakhmat eh ia ka jingpynneh pynsah ia ka mariang, ki madan shnong, bad ka jingthaw kam thaw jam, ha kaba 85.9 akar la mang na ka bynta ki park bad ka madan ba khlem jingker, u la bynrap.
U Conrad ula ong ba ka Town and Country Planning Scheme ka pyniadon bynta ia ki Dorbar Shnong bad ki nongshong shnong ha ka jingplan ia ki kam pynroi. ‘Ka jingtei ia ka New Shillong kaba la leh ha ryngkat ka jingkitkhlieh ia ka mariang, kaba kynthup lang ia baroh ka imlang sahlang, kaba pynkylla iaka ioh ka kot bad ka jingburom ia ki trai shnong” ula ong haba bynrap ba ka Sorkar kala kut jingmut ban pynthikna ia ki jingmyntoi na ka bynta ka Mawryngkneng bad ki shnong ba markhap.
U Myntri Rangbah ula kren ruh halor ki lai tylli ki bynta kiba kongsan jong ka sor New Shillong-ki lad pyniasoh, ka jingsam umbam umdih, bad ka bording”.
Ka lad pyniasoh ka dei u budlum ka New Shillong” ula ong haba kdew sha ka Comprehensive Mobility Plan (CMP) kaba la buh ia ka lynti treikam ba 30 snem.
Ka CMP ka kynthup ia ki surok ba kongsan kum ka Ummir-Mawkhanu (bala dep pyntrei ha ka jinglut T.201 klur) bad ki surok pyniasoh sha ki shnong ki thaw na ka bynta ka jingiaid lynti kaba suk. Ka New Shillong ka ioh jingmyntoi ruh n aka surok Guwahati-Shillong-Silchar high-speed cooridor bad ka jingpynheh ia ka kad liengsuin, kaba buh ia ka kum ka jaka pynroi jong ka thain.
Halor ka umbam umdih, u Conrad ula ong ba ka Detailed Project Report (DRPR) ka kdup ia ka jingdonkam ki 32 tylli ki shnong. “Ka rukom treikam ba thymmai kan ai haduh 56 million liter shisngi ka um sha palat 4 lak ngut I briew” ula ong haba pyntip ba ka phase-1 (T.591 klur) ka dang iaid ka jingpyntrei, bad ia ka um lah tan na wah Umkhen.
Ia ka bording, ka 33 kV Umroh Sub-Station bad ki lain kiba la tan sha kiwei kiwei ki jaka, ki la pynduna ia ka bording. Ka 40 MVA substation ka ban wan ha Mawkhanu bad Umsawli kin sa pynkhlain ia ka grid.
U Conrad ula ong ba ka Master Plan, bala pynkhreh da ka NESAC da kaba pyndonkam ia ka GIS, ka la pyrrkhing ban tei jingtei ha ki jaka ba ju shlem um bad ba ju twa khyndew.
