Kohima, Nailur 23 :Ka thain shatei lammihngi (Northeast) jong ka ri India da shisha ka don ia ki jaka kiba iapher na kawei ka jaka sha kawei pat ia kaba ym pat shym la lah ban sakhi lut.
Kawei na kiba kum kine ki jaka ka dei ka shnong kaba hap hapoh Mon district ka Nagaland.Ia kane ka shnong la tip kyrteng kum ka Longwa, bad kaba kham sngew phylla ka long ba kane ka shnong ka hap hapoh India bad kumjuh hapoh Myanmar.
Kane ka shnong ka don ha ka thain khappud ka India-Myanmar bad kumta ka jinglong jingman jong ki jaka ka dei kaba la iasam lang hapdeng kine ki artylli ki ri ba markhap.
Kaei kaba kham pynsngewtynnad shuh shuh ban tip kalong ba u nongialam jong kane ka shnong hapoh Nagaland u don haduh 60 ngut ki kurim.Katkum ki khubor kiba la mih ha ki snem kiba la dep ia u syiem ba la khot Angh, la ong ba u don haduh 60 ngut ki kurim.U Angh um dei satia tang u syiem jong kane ka shnong, hynrei u dei u syiem jong ki 100 tylli ki shnong.
Kine ki 100 tylli ki shnong, ha kaba u Angh u dei u Syiem ka don hapoh Myanmar, Nagaland bad Arunachal Pradesh.Kalong ruh kaba sngewtynnad ban tip ba ka bynta khappud ka India-Myanmar la ngeit ba kala iaid lyngba na ka iingsah jong u Angh ha Longwa.
Nalor kata, ki nongshong shnong jong kane ka shnong ki don ia ki syrnot nongshong shnong ha baroh kine ki artylli ki ri.Katba kine ki nongshong shnong ka Longwan ha Nagaland ki dei ki nongshong shnong ka India, hynrei ki dei ruh ki nongshong shnong ka Maynmar.
Ia ki la shah sngewbha ba kin iaid laitluid ha baroh ki bynta khappud ka India-Myanmar khlem da donkam satia ia kino kino ki kot ki sla.
