Tinsukia, Nailur 23 :Ki bor shipai kila ioh ban kem ia uwei u suba dkhot ka tnat syntiat ISI ha ryngkat ka kurim jong u napoh kawei ka hotel na Tinsukia ha ka thain shatei ka Assam ha kaba kila ioh ruh ban kurup ia ka identity card jong ka tnat Power Grid Corporation kaba la shu shna thok.
Ia une u briew la tip kyrteng kum u Md Hayat Khatib, 37 snem rta, uba dei u nongshong shnong ka jylla Karnataka bad ka kurim jong u ka Samina Yakub 24 snem rta kaba dei na Jammu & Kashmir. Kine kila shah kem noh hapoh ka Hotel Sapphire.
Katkum ki tyllong khubor na ka tnat syntiat la ong ba kine ki shijur kila shong la sah hapoh katei ka hotel ba remdor ha Tinsukia naduh ka 16 tarik u Nailar ba la dep bad kila pynlong ruh ka jingleit jurip sha Tinsukia la bun bunsien.
Ka tyllong khubor ka iathuh ba hadien ka jingioh ia ka jingtip kaba bniah lyngba ka tnat syntiat, kumta ruh na ka liang ki bor shipai Indian Army na ka tnat 73 Brigade kila pynlong ka jingbud dien kaba jar jar naduh kine ki khyndiat sngi ba la dep hashwa ba kin kem noh ia ki hynnin ka sngi Palei da ka jingiarap jong ki bor pulit ka Tinsukia.
“Une u suba nongsyntiat ka ISI ula shu kam ia lade kum u divisional engineer jong ka tnat Power Grid Corporation of India, uba trei hapoh Changlang, bad ula pyni ruh ia kane ka IS hapoh katei ka hotel kum ka jingpynshisha,” ong shuh shuh ka tyllong khubor.
Haba pynpaw halor ki rukom treikam jong une u suba, ka tyllong khubor kala ong ba une u briew ula iai pyrshang ban ithuh bad ioh iakren bad ki heh jong ki tnat pahara bapher bapher. Kham hadien ula lah ban pyniadei paralok bad ki bad ioh ban rung sha ki jaka ba pyrkhing jong ki shipai bad sha ki jaka ba la khang pyrshah da ka jingiarap ka jong ki, ong shuh shuh ka tyllong khubor.
Ha kaba sdang jong ka jingtohkit, une u briew ula pdiang ba ula wan sha Tinsukia la bun bunsien namar ki kam khaii pateng. “Hynrei hadien ba ki bor pahara kila pyrshang ban pynshisha ia kine ki jingkam ki jong u da kaba iakren bad ki briew kiba ula kam halor ki kam khaii pateng la lap ia ki kam thok ki jong u.
Shuh shuh ka tyllong khubor kala kam ba une u briew mynta ula don hapdeng ka jingshah tohkit ha ka jaka shong jong ki shipai ha ryngkat ka jingdon lang na ka liang ki tnat syntiat kiba pynlong ka jingtohkit.
