Shillong, Rymphang 03 : Watla ka Meghalaya ka dang iai bteng ban long ka jingkit kaba khia ia ka Ri naka jingdon ki nongpang cancer (bampong), ka jingpyrshang ban iada ia kane ka jingpang hapoh ki prokram ka Sorkar Pdeng ka dang iai long kaba tlot bha namar ka jingpynslem ban pyntreikam, ka jingbym biang ki tiar leh screening, ka jingduna nongtrei bad ka jingduna palat ka jingpynsngewthuh paidbah, ong ka jingwadbniah ba thymmai da ki Researchers ka Indian Institute of Public Health (IIPH), Shillong.
Ka jingwad bniah bala ai kyrteng-“ Barriers in Implementing Cancer Prevention Programme in North Eastern India : A Case Study from Meghalaya”- la pynmih ha ka Indian Journam of Medical Research.
Kane ka jingwad bniah, kaba la leh ha ka por ba lynshop ka khlam COVID-19, ka shem ba watla iaka National Programme for Prevention and Control of Cancer, Diabetes, Cardiovascular Diseases, and Stroke (NPCDCS) la pynsdang treikam hapoh ka ri ha u snem 2010, hynrei ia ki kam ba iadei bad ka jingpang cancer ha Meghalaya, kala sdang tad haduh u snem 2018-19, nalor ba buh hakhmat eh ia ka jingpang diabetes bad hypertension.
Ka jingwadbniah ka kdew ia ki jingeh ba don ha ki Community Health Centre, kum ka jingbym don ka acetic acid, kaba long kongsan ban leh screening ia ka cervical cancer (ryndang). Ki Nongtrei ka Koit ka Khiah kila pynpaw ruh ia ka jingbym don ka jaka khmih ba shimet ha ka por ba leh ia ki screening camp, kaba la pynduh mynsiem ia ki Kynthei khamtam ha ki jaka nongkyndong ba kin wan shakhmat ban leh ia ka jingkhmih bniah ia ka jingpang bampong ha ki buin (breast) bad u cervical.
Ka jinglait thylli ba khari khari ha ki kam nongiasyllok, ka jingtynrong bun ki kam ha ki Doktor bad ka jingbym biang ki jingai jinghikai ruh kila pynduna ia ka jingtreikam jong ka bynta kaba lah ban iada ia ka jingpang cancer jong ka NPCDCS. Kiba bun ki Frontline Health Workers kila pyntip ia ka jingbym sngewskhem ha kaban pynlong ia ki screening khamtam ia ka cervical cancer namar ka jingbym biang ki jingai jinghikai- katto kane kila thut namar ka khlam COVID.
Ka jingwad bniah kala kdew ruh ia ki katto katne ki bynta kiba buh jingeh ha ka ban lap bad sumar ia ki nongpang ha ka por kaba biang namar ka jingshah niewbein ha ka imlang sahlang, ka jingngeit ba iap beit da ioh jingpang cancer, bad ka jingshaniah ha ki nongsumar tynrai ban ioh jingsumar. Ha ka District kum ka East Jaintia Hills, ki nongpang bunsien ki hap ban wan haduh 90 km sha Shillong haba phah ki Health Centre ban wan sumar bad kane ka lam sha ka jingdon bun kiba pep ban wan. Ka jingbym don ki lad ban buddien ia ki nongpang kala buh ha ka jingeh ia ki Health Centre ban tip la ki nongpang ba ki phah ki wan poi ne em sha hospital ban ioh ia ki jingsumar.
Ki don katto katne ki jingeh bala shem ha ka jingpyrshang ban iada ia ka jingpang cancer ha Jylla bad ki Nongwadbniah kila pynpaw ba ka long kongsan ia ka Meghalaya ban leh eiei halor kine haba iohi ia ka jingnang bun ki nongpang cancer ha Jylla. Kila ai jigmut ia ki sienjam kum ka jingpynkhlain ia ki jaka leh screening, pyniar ia ka lyngkha pynsngewthuh paidbah ha ka ktien lajong, thung briew ha ki kam ba lait bad pyndonkam ia ki Village Health Council ba kin tei ia ka jingshaniah bad pynduna ia ka jingniew bein ia ki nongpang.
Ka jingwad bniah kala maham ba ka jingpynslem ban pynkhlain ia ki lad jingiada bad ka jinglap kloi ia ki nongpang, ka lah ban ktah jur hadien habud, khamtam ia ki jaka nongkyndong.
, ka jingpyrshang ban iada ia kane ka jingpang hapoh ki prokram ka Sorkar Pdeng ka dang iai long kaba tlot bha namar ka jingpynslem ban pyntreikam, ka jingbym biang ki tiar leh screening, ka jingduna nongtrei bad ka jingduna palat ka jingpynsngewthuh paidbah, ong ka jingwadbniah ba thymmai da ki Researchers ka Indian Institute of Public Health (IIPH), Shillong.){kind=link}