Shillong, Nailur 22 : Ka Hynniewtrep Youth Council (HYC) hynne ka sngi palei,kala dawa ban tohkit da ka kynhun Central Bureau of Investigation (CBI) halor ka jingshah siat iap u Nongialam barim ka Hynniewtrep National Liberation Council (HNLC) Bah Cheristerfield Thangkhiew, ban pynthikna ia ka jingpynsajia iabaroh kiba donbynta ha kane ka kam bymman.
Ka HYC kala buh ia kane ka jingdawa lyngba ka dorkhas sha u Myntri Rangbah ka Jylla Conrad K Sangma kaba ong “Ngi dawa kiei kiei kiba jia ba lam sha ka jingiap jong u nongiap (Cherist) dei ban tohkit da ka kynhun tohkit ba laitluid, lait noh ki Pulit ka Jylla, bad lada ka jingtohkit kala sdang, ia kane dei ban aiti noh sha ka CBI ba kan tohkit bniah bad ruh ban ai jing pynsajia ia baroh kiba don bynta ha kane ka kam bymman ba lam sha ka jingiap u Bah Cherist”.
Ka HYC kala kynnoh baka Sorkar kala thung ia ka One Man Inquiry Commission ne ka jingtohkit jong uwei u briew, ka dei tang ban shu pynkmen ia ki paidbah ka Jylla hadien ba mih ki jingpyrshah bad jingiakhih namar ka jingiap u Bah Cherist myn ha ka 13 tarik Nailar 2021.
Ka HYC ka ong ba ha ka kaiphod jingtohkit, ka Commission kala kren shai ba ka jingkhynra ka dei kaba la pynkhreh bha hynrei la pynlung lymmuh, thurmur, kyrkieh bad khlem da pyndonkam ia ka bor pyrkhat. Ha kawei ka kyntien ka dei ka jingkhynra ba pynlamwir pynban”.
Ka Commisson kala kdew ruh ia ka jingkhynra bala pyndonkam palat pud ia ka bor da ka Tactical Team-I kaba dei ban leit sha ka Iingsah u Bah Cherist ban khynra tang ban kem im ia u ym ban siat iap.
Ka HYC ka ong ba ka jingshem jong kane ka jingtohkit ka long kaba shai bha ba ki dkhot ka Tactical Team-I ki dei ka daw ba lam sha ka jingiap jong u Bah Cherist bad namar kata, dei ban hap tohkit ia kane, buh ha ka jingbishar ain bad ban pynsajia ia kiba don bynta ha kane ka kam bymman kat kum ka ain ka Ri.
“Ka long kaba shaiong ban iohi ba ka Sorkar Jylla ha ka jaka ban pyntrei ia ki jingshem jong ka jingtohkit ha ka para 34 jong ka kaiphod, kala pyrshang pynban ban pynslem ia kane ka kam lane pyrshang ban iada ia ki briew ba donkti da kaba pynmih ia ka shithi pan jingpynshai na ka Tactical Team-I kaba la kdew ha ka memorandum of action halor ka kaiphod jingtohkit” kala ong.
