Shillong, Nailur 22: Ka Central Puja Committee kala pyntip ba mynta ka kynti kan pynlong iaka Durga Puja naduh ka 1 tarik haduh ka 5 tarik u Risaw kaban dei syndon ka sngi ban pyndep iaka Bret Blei.
U General Secretary ka CPC u JL Das ula ong mynta u snem, kin don 257 tylli ki puja Mandal Committee ha ka jylla Meghalaya bad tang ha nongbah Shillong ki don 65 tylli bad kin don kumba 15 tylli ki jaka Bret blei ha ka jylla.
U la iathuh ba shwa ban sdang ka puja ka CPC kan pynlong iaka All Faith Get Together ha Kenches Trace ha ka 28 tarik u Nailur, kaba yn wan ban iashimbynta da ki nongialam niam na ki niam bapher bapher bad ia kane ka jingialang yn plie da u Myntri Rangbah ka jylla u Conrad K Sangma.
U President ka CPC u Naba Bhattacharjee, ula ong, ha ki sngi ba ju don ka puja ka jur bha ka jingdheng kali, kumta ka CPC kala kyrpad iaka Deputy Commissioner ka East Khasi Hills, ba ha ki sngi ba don ka puja, dei ban pynkamai iaki Bos Saw haduh 11 baje mynmiet bad ka CPC ka kyrpad ruh ia ki riewngeit ban ym rah kali haba ki leit rung na kawei ka Puja Mandal sha kawei pat, khnang ba kan ym buh jingeh ia kiwei pat ki bym rakhe ia ka puja.
U la ong, hadien ba la bep ka Bret Blei kan don ruh ka jingpynkhuid iaka jaka Bret Blei ha Polo, Shillong bad ym dei ban pyntuid ia kino kino ki tiar ne ki Blei thaw sha ki wah bad kadei kum shi bynta ban iada iaka mei mariang.
