Guwahati, Nailur 22 : Sa uwei pat u briew uba la shah kynnoh donkti hakhmat eh halor ka jingjia shah thang jong kawei ka police station ha Batadrava ula shah kem noh na Morigaon district ka Assam hynnin ka sngi Balang.
Ki tyllong khubor ki iathuh ba une u briew uba la don hapdeng ka jingphet rieh u dei uba la tip kyrteng kum u Safikul Islam uba la shah kem noh na ka jingwan khynra jong ki pulit ka Morigaon bad ka Nagaon, kata katba u dang trei hapoh kawei ka jaka shna maw it ha Moirabari ha ka kyrteng jong u Akash ali.
U Safikul la ong ba u dei u nongshong shnong jong ka Haidubi Reserve Basti ha Batadrava bad u dei uwei na kiba la shah kynnoh donkti ha katei ka kam pyntriem.
Katei ka jingjia ba triem kala jia ha ka 21 tarik u Jymmang ba la dep hadien ba ki spah ngut ki paidbah kila thombor ia ka Batadrava police station ban pynpaw pyrshah halor ka jingkynnoh iap jong uwei u briew ha ki kti jong ki pulit, kata da kaba thombor naphang ia ki pulit kiba don hapdeng ka kam bad pynjur ia ka police station hashwa ba kin thang ia ka.
Ha kane ka jingshah thombor la iathuh ba laingut ki pulit kila ngat ha ka jingmynsaw kaba jur.Kine ki paidbah kiba kynthup ruh ia ki longkmie kila thombor ia kane ka police station hadien ba uwei u nongdie dohkha uba kyrteng u Safiqul Islam uba la shah set hapoh katei ka police station la kynnoh ba ula khald noh hapoh ka jingpeit jong ki pulit.
Ki video kiba la saphriang halor katei ka jingshah thang ka police station kala iarap na ka bynta ban ithuh ia ki briew kiba donkti.
Hadien ka jingpynrem jur halor katei ka jingjia, ki nongsylla kiba hakhmat eh kiba kynthup ia u Ashiqul Islam kila shah kem noh.Watla katta u Ashiqul ula khlad noh ha ka jingjia tyngkhuh kali ha Raidongia hapoh Nagaon district ha ka sngi kaba ula shah kem noh.U Islam la kynnoh ba ula pyrshang ban phet krad na ka kali da kaba ryngkoh hadien ba ula shah tynrah ha ka kali pulit kaba bud nadien.
Ha ka 14 tarik u Nailar ba la dep, ki pulit ka Nagaon kila phah da ka jingujor ha kaba iadei bad katei ka jingshah thang jong ka police station kaba la jia ha ka 21 tarik u bnai Jymmang ba ladep.
Ka Superintendent of Police (SP) ka Nagaon, ka Leena Doley kala ong ha katei ka por ba haduh 24 ngut ki briew kila shah jer kyrteng kum kiba donkti ha katei ka kam thombor, ha kaba 12 ngut na ki, kidei kiba dang hapoh rta kiba la shah kem noh.
Katba uwei na kiba la shah kynnoh donkti u Ashiqul Islam ula khlad noh kham hashwa na ka jingtyngkhuh kali, napdeng ki 11 ngut khyndai ngut kila shah set mynta hapoh Nagaon central jail, katba uwei napdeng ki arngut kiba dang khynnrah rta ula don hapoh ka jaka set kyrpang bad uwei pat ula lait jamin.Haduh mynta kila don 12 ngut kiba la shah kynnoh donkti ha katei ka kam thombor kiba dang don hapdeng ka jingphet rieh.
