Shillong, K’lyngkot 29: Ka Sorkar Jylla kala pan jingiarap ba T.100 Klur na ka Sorkar Pdeng ban pynlong ia ka 39th National Games ha u snem 2027.
Ha ka jingthoh kaba la aiti ha u Myntri Rangbahduh ka ri Narendra Modi hynne ka sngi Palei, u Myntri Rangbah ka Jylla Conrad K Sangma ula ong, “Ka jylla ka kyrpad ia ka jingkyrshan pisa ba T.100 Klur na ka Ministry of Youth Affairs and Sports jong ka Sorkar India, ha kaban pynkhreh ia ki rynsan iakob ialehkai, ka jingpyniaid bad ka jingiatreilang hapdeng ki jylla bapher namar ka jingheh jong kane ka lympung ialehkai”.
U Sangma ula ban jur ruh ba ka Meghalaya kan pynlong ia ka 39th National Games ha u 2027 kaba long u mawmer uba khraw tam ha ka ri, da kaba wanrah lang ia ka lympung iakob ialehkai kaba heh ha ka ri sha ka thain shatei lammihngi bad ban shna ia ki jingtei bapher bapher ha ki kam ialehkai bad ka jinglah ne ka jingkot bor ka jongki.
Ula pyntip ba ka jylla kala kynshew pisa kumba T.1,000 Klur naduh ba liasoi ia ka kontrak ban pynlong ia katei ka lympung ialehkai, ban thaw ne shna ia palat 200 tam ki jaka ialehkai ha ki kyrdan bapher bapher bad kala buh ruh ia ka jingkular sa T. 1,900 Klur ban pynut na ka bynta ki 3 snem kiban sa wan.
“Hapoh u snem 2028, ka Jylla kan don haduh 500 tylli tam ki jingtei bad ki jaka ialehkai ha kylleng ki block, district kaban kynthup ruh ia ka Football Stadium kaba heh tam ha ka ri, ka First Natural Slalom Course ka jaka ia kinglieng ha ka Wah kaba dei kaba nyngkong eh bad ka Aquatics kaba don ia ka kyrdan ha ka pyrthei bad ia ka Gymnastics Complexes kiba long ki jingtei kiba heh bad kaba kynthuplang ia ka jinglong jingman sawdong sawkun ha ki kam ialehkai baroh” la pynpaw u Sangma.
Kaba iaid ryngkat bad ka jingiohi jngai jong ka ri kumba la pynbna ha ka 38th National Games, u Myntri Rangbah ula pynbna ba ia ki katto katne tylli ki jingiakob ialehkai jong ka 39th National Games yn pynlong lang ruh da ki Jylla jong ka thain shatei lammihngi ka ri.
“Kane ka kyntiew lang ia ka thain baroh kawei, ka Meghalaya kan bei ia baroh ki jingpynlut pynsep kaba kynthup naduh ka jingsah, ka jingpynbiang ia ka bam, ka leit ka wan, ka jingpynlong ia ki jingiakob, ka jingpynbna nam, ka jingpynkhreh ia ki jaka ialehkai ha kylleng ki jaka ialehkai bad ka jinglut jingsep baroh jong katei ka lympung iakob ialehkai kan kot kumba T.400 Klur” ula ong bad ka pynksan ia ka jingkyrpad ia ka Sorkar Pdeng ba kan ai lem ia ka jingkyrshan.
