Nongpoh, K’lyngkot 29 : Ki Pulit ka Ri-Bhoi District, ha ka sngi Palei, kila ioh kem ia u runar uba phetrieh na ka kti jong ki Pulit ka Mawngap Police Station, kiba la thwet ia u halor ki kam pyntriem ha ka thain.
Une u runar u kyrteng u Teibor Mawong uba shah thwet ha ki Pulit ka Mawngap PS, kiba la pynngat ia u hapoh ki kyndon 323/325 IPC bad kyndon 376 IPC.
Ia une u runar la ioh kem na kawei ka khlaw ba la tip kum ka Kseh Kynjoi, ha ka jingkhynra kaba la pynlong hadien ka jing ioh jingtip ba une u runar ula riehtngen ha kane ka khlaw.
U Superintendent of Police ka Ri-Bhoi, ula pyntip ba ia une u runar la ioh ban kem da ki Pulit ka Umsohlait Police Station, kiba la ioh ruh ban kurup ia kawei ka pistol shna hi, ka jri bad ka mobile phone.
Ia une u runar la kit noh sha thanad bad ka jingtohkit mynta kala iaid shakhmat.
