Shillong, K’lyngkot 29: U Myntri Rangbah ka Jylla u Conrad K Sangma hynne ka sngi Palei, ula pynpaw ka jingsngewnguh ia u Myntri Rangbah duh ka ri Narendra Modi bad Myntri ka Sorkar Pdeng uba khmih ia ka tnad Kolshor Gajendra Singh Shekhawat halor ka jingjied ia ka Jingkieng Jri ka Jylla ban phah ia ka jingtyrwa sha ka UNESCO ban ithuh kum ka World Heritage Site.
“Paralok kumba phi tip, ka Jingkieng Jri ne ka Living Root Bridge kala rung ha ka thup kyrteng kaba la phah da ka Sorkar India ban shah pynrung noh ha ka UNESCO World Heritage Site. Nga shim ia kane ka kabu ban ai khublei ia u Myntri Rangbah duh ka ri bad ia u Myntri ka tnad Kolshor kiba la pdiang ban phah ia katei ka jingtyrwa” pynpaw u Conrad Sangma ha ka kyrwoh khubor lyngba ka video.
Kane ka jingtyrwa ia ka “Jingkieng Jri / Lyu Chrai Cultural Landscape, Meghalaya,” kadei kaba la dep ban aiti ha Paris da u Nongrahtien Syiem ne Ambassador ka ri India bad u Permanent Representative sha ka UNESCO u Vishal V. Sharma ha kaba ula aiti ha u Lazare Assomo Eloundou uba long u Director ka UNESCO’s World Heritage Centre.
U Conrad ula pynpaw ba ka long u mawmer ha ka histori jong ka Meghalaya, ha kaba phah ia ka jingthoh sha u Myntri Rangbahduh ka ri u Narendra Modi da kaba ong, “Ka jingphah ia ka jingtyrwa ba ia ka Jingkieng Jri / Lyu Chrai Cultural Landscape (Living Root Bridge Cultural Landscape) ban pynrung ha ka thup jong ka UNESCO kum ka World Heritage List kadei ka khyllipmat kaba khraw ia ka jylla bad ia ki paitbah”.
Ula ong, ba kane ka jingtyrwa ka pyni ia ki 8 snem jong ka jingiatreilang kaba kynthup ia ki 63 tylli ki shnong, 42 tylli ki Cooperative bad 120 tylli tam ki Jingkieng Jri, kaba pyninam ia ka jingiatylli, ka jingshimkhia da ki shnong ki thaw ha kaban pynneh pynsah ia ki jingdon kiba naduh hyndai hynthai.
U Sangma ula banjur ba katei ka jaka ka mihkhmat ia ka rukom thain lang ia ki khlaw ki btap, ki wah, ki lynti iaid, ka rit dustur bad ki jingleh kiba iada ia ki jingim ha ki sawdong sawkun, kaba pyni ia ka jingiadei kaba kham phylla hapdeng ki paitbah bad ka mariang ha rilum Khasi bad Jaiñtia.
“Da ka jingngam tynrai ha ki jinglong kordor jong ka jingiatreilang, jingieid, jingburom, jingshaniah bad ka jingtrei shitom, kane ka jaka kaba itynnad ka tyrwa ia ka nuksa kaba khlain bha ban iakhun ne kyrda ia ka jinglong ka suinbneng, ha kaba ki briew bad ki jingim jong ka mei mariang ki imlang da ka jingsuk jingsain” ula ong.
