Tura, Kyllalyngkot 23: U Deputy Commissioner ka West Garo Hills District u Vibhor Agarwal hynne ka sngi Thohdieng, ula lum ia ka jingialang pyniasuk ka Ba-ar, ha Tura Circuit House, ban wanrah ia ka jingshongsuk bad shongshngain hadien ba kala mih kawei ka jingjia ha Rajabala.
Ha kane ka jingialang la wan ban iashimbynta da u Superintendent of Police (SP) u Abraham T Sangma, ki heh ophisar sorkar, ki nongialam jong ki kynhun bad ki sengbhalang bad ki riewpawkhmat na kylleng ki district jong ka rilum Garo.
Haba kren ha katei ka jingialang, u Deputy Commissioner ula ong, ba ki bor pyniaid district kila buh hakhmat eh ia ka jingshngain bad jingiada ia baroh ki nongshong shnong.
Ula pynpaw ruh ba ka jingiatai ha ka jingialang kala long kaba seisoh bad la ioh pdiang ia ki jingai jingmut na ki nongmihkhmat ia ka imlang sahlang ban shim ia ki lad ban iarap ha kaban tehlakam ia kum kitei ki jait jingjia ha ki por ban wan.
Ula maham ruh bay m dei ban pynsaphriang ia ki khubor kiba thok namar ba ki khubor ki bym shisha lyngba ki rynsan social media ki lah ban nang pynjur shuh shuh ia ka jingiakynad bad ula kyntu ia ki paitbah ba kidei ban shaniah na ki lad pathai khubor kiba shisha bad ka pyntip ba la sam ruh ia ki phone number jong baroh ki police station ban ailad ia ki nongshong shnong ba kin pynshisha ia kino kino ki jingtip hashwa ba ki thmu ban pynpaw eiei.
Ki bor pyniaid district kila iatrei ryngkat ruh bad ki nongialam niam bad nongialam shnong, kiba pynlong ia ki jingialang ha ki shnong ki thaw ha kylleng ki bynta jong ka West Garo Hills ban pynjaijai ia ki jingsngewpher bad ban phah kiar ban leh ia kino kino ki kam kiba long pyrshah ia ka aiñ.
Ki bor pyniaid district ki dang peitngor ruh ia ka jinglong jingman ia ki rynsan social media bad ia ka jinglong jingman ha ki shnong ki thaw ban tem ia kino kino ki dak ki shin ban pynmih ia ka jingiakynad.
U Deputy Commissioner ula pynpaw ba ka jingiatreilang hapdeng ki pulit, ki shnong ki thaw bad ki nongialam shnong ka long kaba kongsan tam ban pynneh ia ka shongsuk shongsain. Da ka jingpynjur ia ki bor pahara ryngkat bad ka jingiakren, ki bor pyniaid district ki don ia ka jingngeit kaba skhem ba kan sa wanphai biang ka shongsuk shongshngain kaba pura.
