Tura, K’lyngkot 23 : Ka bor pyniaid District ka West Garo Hills kala pynjari da ka kyndon 163 jong ka Bharatiya Nagarik Suraksha Sanhita (BNSS) ha ki katto katne ki jaka jong ka District hadien ka jingioh khubor ia ka jingshah shoh ki dkhot sengbhalang bad jingtieng ioh mih ka jingkynad pher Jaidbynriew.
Kat kum ka hukum bala pynmih da u District Magistrate Vibhor Aggarwal, ka jingjia iashoh kala mih na ka thain Goalgoan kaba hap hapoh ka Rajabala Police Station, kaba pynkhuslai ia ka jinglah ban mih ka jingthut ka shongsuk shongsain ha ki bynta jong ki jaka them ka West Garo Hills.
Ka hukum ka ong ba ki jingjia iakynad ba dang shen ha kane ka thain kaba iashong khlem jaidbynriew kala mih namar ka jingiaid ki khubor ba ialam bakla, kaba lam sha ka jingbym iashaniah hapdeng ki Jaidbynriew ba ia im iasah ha ka thain.
Ka bor pyniaid District kala pynpaw ia ka jingdonkam mardor ia ki lad jingiada khnang ban tehlakam ia kino kino ki jingjia ki bym sngewtynnad.
Halor kane ka jingpynjari, la khang ban ialum haduh 5 ngut ne palat ki briew ha ka shijaka, ban iarah ia ki tiar pynmynmaw kynthup ki dieng, ki rod bad ki maw-ka ban sdang treikam naduh ka por 6 baje janmiet jong ka 23 tarik Kyllalyngkot haduh ka 6 baje mynstep tad haduh da pynmih da kawei pat ka jingpynbna.
Kane ka jingpynjari ka treikam ruh ha ki jaka kiba ikop don jingma ba hap hapoh u pud u sam ka Hallidayganj, Rajabala, Phulbari bad Tura Police Station. Kane ka hukum ka treikam ha ki 37 tylli ki shnong.
Ka jingpynkhein ia kane ka hukum kan khring ia ka jingshah pynshitom kat kum ka kyndon 223 jong ka Bharatiya Nyaya Sanhita (BNS) lane kiwei kiwei ki ain kiba lah ban pyntreikam, maham ki bor District.
 ha ki katto katne ki jaka jong ka District hadien ka jingioh khubor ia ka jingshah shoh ki dkhot sengbhalang bad jingtieng ioh mih ka jingkynad pher Jaidbynriew.){kind=link}