Tura, Jan 21: Ha ryngkat bad ka jylla hi baroh kawei, hynne ka sngi Balang la rakhe ia ka jingdap 54 snem ka jylla Meghalaya ha DC Park, Tura, ha kaba ki nongkren kila kren halor ka histori ka jingiaid lynti ka jylla, ka jingkiew ka ioh ka kot bad ka jingkongsan ban pynneh pynsah ia ka kolshor ba riewspah naduh hyndai hynthai.
Haba kren ha ka jingialang u Deputy Commissioner ka West Garo Hills u Vibhor Agarwal ula ai khublei ia ki paitbah ka district bad ka pynpaw ia ka jingkylla dur ka Meghalaya naduh ba kala ioh ia la ka jong ka jylla ha u snem.
Ula ong ba ka jylla kala shim ia kiba bun ki sienjam ha kaba iadei bad ka jingroi ki jingtei, ka jingai jingshakri bad ka jingkiew ha ka thain, kaba la buh ia ka Meghalaya ha ka kyrdan kum kawei napdeng ki jylla kiba kiew sted bha ka ioh ka kot hapoh ka ri.
Haba kdew shaphang ka jingiaid shakhmat katkum kane ka juk, u Agarwal ula banjur ban iada ia ki kolshor kiba naduh hyndai hynthai kiba don ha ka jylla ka long kaei kaei kaba dei ban buh hakhmat eh.
Ula banjur ba ia ka jingdonkam ban iaid da ka mishon da kaba shimkhia ha kaban pynkupbor ia ki samla, da kaba o g ba ki samla kidei ki bor jong ka jylla Meghalaya.
Ha kaba iadei bad ka jingiohi jngai u Myntri Rangbah, u Deputy Commissioner ula ong ba ki shnad kum ka Meghalaya State Skill Development Society bad kiwei kiwei ki tnad sorkar kila pynwan ryntih ia ki prokram ban pynkup bor ia ki samla bad kane ka juk bad ki sap ki phong ha kaban trei ban ktah ha ki karkhana. Ka jingpynkhlain ia ka bor jong ki samla ka long kaba donkam ia ka jylla ban neh ha ka jingiakhun kaba jur ka jingkylla ha ka jinglong jingman jong ka ioh ka kot.
Ka Jyostna D. Sangma, ka Associate Professor ka Tura Government College, kala kren halor ka histori jong ka jingthaw ia ka jylla Meghalaya bad pynkynmaw ia ka jingiakhih da ka lynti kaba jai jai kaba la lam sha kaban ioh ia ka jylla la jong.
Kala pynpaw ba ka Meghalaya kala ioh shwa ia ka kyrdan ‘Autonomous State’ hapoh jong ka Assam Reorganisation Act 1969, hashwa ban ioh ia ka jylla kaba pura ha 21 tarik u Kyllalyngkot, 1972, hapoh jong ka North Eastern Areas Reorganisation Act, 1971.
Kala pynpaw ruh ia ka jingriewspah ka Meghalaya ha kaba iadei bad ka kolshor bad ki shad tynrai kum ka Wangala, Shad Suk Mynsiem, Behdienkhlam bad Shad Nongkrem bad kala ai burom ia ki nongialam bad ki nongiakhun ban pynioh ia ka jinglaitluid kiba la leh ia ka bynta kaba khraw ha kaban saindur ia ka jinglong tynrai jong ka jylla, kiba kynthup ia u Captain Williamson A. Sangma, Sonaram R. Sangma, Modi K. Marak, Hoping Stone Lyngdoh, Wilson Reade, u Tirot Sing Syiem, u Kiang Nangbah bad u Pa Togan Nengminja Sangma.
La pyniphuh ia kane ka jingrakhe da ki jingshad tynrai, ka jingput ia ki bangsi bad chigring da u Preman D. Sangma bad ka jingpyninam ia ka kolshor da ka Tantani Group Garo Folk Fusion Band (MGMP) bad la pynkup burom ruh ia ki nongjop dang shen ha ka lympung iakob.
La pynkut ia kane ka prokram da ka jingduwai kaba la ialam da u Rev. Dilseng M. Sangma, General Secretary ka ABDK, Garo Baptist Church, Tura.
