Shillong, K’lyngkot 19: Ka jingriewspah ka Meghalaya ha ka kam thain tiar lyngba ki siej kala ioh ia ka jingithuh ha ka ri ha ka kyrdan kaba heh tam, ha kaba ki jingthain lyngba ki siej na ka jylla, kila shah jied kum ki ‘At Home’ Invitation Kit ne ki tiar ai sngewbha sha kito kiba la shah khot ha ka jingrakhe ka ri India ia ka Republic Day kaba 77.
Ia kine ki tiariai sngewbha, kaba la shna kyrpang na ka bynta kito kiba la shah khot ban iashimbynta ha ka Republic Day ha ka jingialang kaban long ha Rashtrapati Bhavan ha ka 26 tarik u Kyllalyngkot, ka pyni bad rakhe ia ka jingriewspah jong kiei kiei kiba la hyndai hynthai jong ka thain shatei lamihngi ka ri India.
La pynwandur da ka National Institute of Design (NID), Ahmedabad, kane ka jingai ia ki kitei ki tiar sha kiba shah khot sngewbha kadei kaba la pynwan da ka rukom pyrkhat ban ai ia ki nongshah khot sngewbha da ki jain bad ki tiar tynrai kiba la thain da ki kti da ki 8 tylli ki jylla ka thain shatei lammihngi ka ri India.
Ka Meghalaya kala ioh ia ka bynta da ka jingdon ia ki siej jyrngam kiba ai mynsiem ban shna ia ki knup tynrai ban iada na u slap, kaba pyni ia ka jingiadei kaba jylliew ka jylla bad ka kam thain jingthain lyngba ki siej bad ka rukom im kaba iai neh.
Ki ophisar kila pyntip ba kane ka jingshna ia ka jingai sngewbha kadei ban ai sha kiba shah khot sngewbha bad ban ioh ia ka jingshemphang ia ka rukom thain tynrai jong ka thain shatei lam mihngi da kaba wanrah lang ia baroh ki bynta na ka jylla Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura bad ia kine la shna lyngba ka jingdon ia ka jingiatreilang kaba iajan bha hapdeng ki nongthain kti ka thain bad ka kynhun kyrpang kaba pynwandur pynwandar bha.
Kawei na ki tiar ai sngewbha, kadei ka “Scroll’ kaba wah ha ki kynroh da kaba pyndonkam ia ki siej bad ki jingthain ban pyni ia ki kolshor bad ka riti dustur ba bun jait jongki jylla ka thain shatei lammihngi.
Kane ka jingpynwandur kadei kaba la pynmih na ki 8 tylli ki jylla ka thain shatei lammihngi, ka jingshna ia ka Scroll kaba don ryngkat bad ki rong jong ki ksai ka lama ka ri, kaba lam sha ka rukom thain kaba kyrpang da ki kor kaba la pyndonkam salonsar da ki kynthei bad la sop da ka jingthain kti kaba don ia u painpoh, katei ka synduk ka don ia u shylliah siej uba la thain da ki kynthei ka Tripura, ka kot kaba la shna hi bad ka jingjlih jong ki jingshna lyngba ki siej.
Ha kane ka synduk ne Invitation Box kaban phah sha ki nongshah khot sngewbha kadei kaba la ioh mynsiem na ki jingshna tynrai jong ka thain shatei lammihngi.
Ha ka bynta kaba hakhmat la pynwandur bad pynitynnad lyngba ki jingdro bad jingthoh ka jylla Assam kaba la bud pat da ki jingthung bad ki mrad kiba don ha ka thain. Kane ka scroll ka kynthup ruh ia ka rukom thain Thara ka Sikkim ryngkat bad ka Gogona, ka bynta kaba pyndonkam ha ka jingrakhe ia ka Rongali Bihu.
Kiwei pat ki kynthup ia ka Mithun Motif kaba la thain na u Monk Shugu ka kot sada kaba la pynmih hi kaba mihkhmat ia ka jylla Arunachal Pradesh. Ki siej bad ki jingdeng siej kiba la shna pyndait bha na ka jylla Tripura, ka jain Khiamniungan jong ki kynthei na ka jaidbynriew Naga, ki soh bad ka Puan Chei ka jainkup tynrai ki kynthei Mizo kaba ki kup ha ki jingialang kiba kyrpang. Ka Manipur kaba la pawnam ha ka Longpi Black Pottery, kala pynwandur da kaba shna na ka khyndew bad ki maw kiba iong, kidei ki bynta kiba kongsan bha.
Ki nongshah khot sngewbha kiba leit ban iashimbynta ha Rashtrapati Bhavan ha ka 26 tarik u Kyllalyngkot kin shah pdiang sngewbha da ki jain ryndia kaba pyni ia ka jingriewspah ka jingpynmih ia ki jain tynrai naduh ki por hyndai ha ka thain shatei lamihngi. Ka jain ryndia ia kaba la tip ruh kum ka jain jong ka jingsuk ne “Peace Silk” kadei shi bynta jongka ioh ka kot bad ka kolshor tynrai. Kane ka jain kaba deng kadei kaba la thain da ki kti.
