Shillong, Nailur 21: Ki Pulit iaid pahara jong ka Pastuer Beat House, kila ioh kem hynne ka step sngi Balang, ia uwei u Nongkhaii droks ba ju die droks ha Iew Polo.
Ki Pulit kila bat ia une u runar halor ka jingsuba ba u dei u nongkhaii droks, kaba la ishankhmat na ka rukom iaid rukom ieng jong u hapoh ka Thain. Kane kala jia ha ka por 8.20 baje mynstep.
Hadien ba ioh bat, ka kynhun ki Pulit Anti Narcotics Task Force (ANTF) kala buddien bad talasi ia ka met jong u ha kaba kila ioh ban kurup haduh 18 tylli ki bitor rit (vial) ba don u droks ba khot 1.85 gram.
Ki Pulit kila kurup ruh ia kawei ka mobile phone bad ka pisa ba T.1750. Ia une u runar la register case hapoh ka kyndon jong ka NDPS Act. Ka jingtohkit ia u ka dang iaid shakhmat.
