Shillong Nailur 21: Ka Khasi Hills Autonomous District Council bad ki khlieh nongsynshar kila shim ia ka rai ban dawa na ka sorkar jylla ba pynbeit thymmai iaka Notification ban ym pyntreikam iaka CrPC bad CPC ha ka jylla baroh kawei.
Ia kane ka rai la shim ha ka jingialang bala long hapdeng ka KHADC bad ki Khlieh Nongsynshar hynne ka sngi Balang ha State Convention Centre, Shillong.
“Ka jingialang kala rai ban phah da ka jingthoh sha ka sorkar jylla ba kadei ban pynmih sa kawei ka notification ban ym pyntreikam iaka CrPC bad CPC ha ka jylla baroh kawei” pyntip u Chief Executive Member (CEM) ka KHADC bah Titosstarwell Chyne haba iakren bad ki lad pathai khubor.
Kat kum ka jingong jong u kane ka Notification ba thymmai ka dei ban kdew shai ba ia ki mukotduma kiba iakhun hapdeng ki riewlum dei ban tian bishar beit da ki District Council Court.
“Ka Notification kaba mynta kam shai bad ngi don iaka jingsheptieng” ong u Bah Chyne.
“Lada ka sorkar kam ngeit, ki khlieh nongsynshar kila pynpaw ha ka jingialang ba kin pynmih ia u paidbah ban pyrshah jur iaka sorkar jylla” ula pyntip.
Ia katei ka jingialang la pyniaid da u Bah TW Chyne ha ryngkat ka jingdonlang u Nongialam ka Liang Pyrshah u Bah PN Syiem, ki Executive Member ka KHADC, ki MDC, ki Syiem, ki Sordar, ki Rangbah Shnong bad kiwei kiwei.
