Shillong, Nailur 21 : Ki kynhun Balang Khristan hapoh ka lama jong ka Meghalaya United Christian Forum (MUCF) kila pynpaw ka jingsngewkhia halor ki jinglong jingman kiba lah ban mih namar ka jingthmu jong ka sorkar ban plie ia ki jaka pyniakhalai (gambling casino) ha ka jylla, ha kaba kala kyntu biang ia ka sorkar ba kan pynkylla noh ia ‘Meghalaya Regulation of Gaming Act.’
Ka MUCF ha u kyrwoh lyngba u Rev.B.Dunai Chairman bad Prof.S.Kharshiing Secretary, kala ai ka jingiaroh halor ka rai jong ka sorkar ban pynsangeh shipor ha kaba iadei bad ka jingai laisen ba shipor bad ka jingmynjur ban pynsangeh ia kine ki casino.
Ha kajuh ka por kala kyrpad ruh ia ka sorkar jylla ba kan shimkhia bad pynkylla ia ki jingthmu ban pyntreikam ia kine ki jaka pyniakhalai.
Na ka liang ka MUCF ka ngeit ruh ba kino kino ki jait polisi ki bym don ia kata ka nongrim ka jingsngewthuh ia ka bha bad ka sniew kin wanrah ia ka jingjot thiaw ia ki nongshong shnong bad ia ka imlang ka sahlang hi baroh kawei.
