Shillong, K’lyngkot 15 : U Myntri Rangbah ka Jylla Conrad K Sangma ha ka sngi Palei, ula pyntip ba ka Sorkar kala shimkhia bha ban pyndep noh ia ka jingker sainar ha shilynter ka khappud bad ka ri Bangladesh.
Haba kren sha ki lad pathai khubor, u Conrad ula ong ba ka Sorkar India ruh kala buddien bha ia kane ka kam.
“Ngi la shimkhia bha halor kane bad nga kyrmen ba kiei kiei baroh kin sa dep noh kham kloi” bynrap u Conrad.
U Conrad ula pyntip ba kumba 40 Km na ka 440 km ka jingker sainar ha khappud ka dang sahteng bad ka daw ka kynthup ia ka jingsngewkhia ki paid khappud, ka kam thied jaka bad ki mukotduma ha Iingkashari kiba la pynsuki ia ka jingiaid shaphrang ka kam.
“Ngi la shim ia ki sienjam kiba donkam…nga khmih lynti ba shen, namar kumba nga ong, ki don katto katne kiba don ha ka mukotduma ha iingkashari, khamtam ha ki thain West Jaintia Hills, kaba jrong duh u pud u bym pat dep ker sainar” ula ong.
Haba ban jur ia ka jingpeitngor ka Jylla sha ki jaka khappud bad ka Bangladesh, u Myntri Rangbah ula ong “Ka Sorkar Meghalaya, ki BSF bad baroh ki Agency kila peitngor bha”.
Ula pyntip ia ka jingialang bishar kam ba long ha ka 24 tarik Nohprah, 2025, bad ki Agency bapher bapher kynthup ki BSF bad IB, kaba iakren ia ka jingshngain bad jingiada ha ki jaka khappud.
