Shillong, K’lyngkot 14 : U Myntri ka Koit ka Khiah Bah Wailadmiki Shylla ula pynthikna ba ka Tura Medical College kan dei ka college ban pyniaid hi noh da ka Sorkar, haba pynsangeh ia ka jingthmu ban pyniaid da ka Public-Private Partnership (PPP).
Haba kren sha ki nongthoh khubor ha ka sngi Balang, u Bah Shylla ula ong “Ia mynta, ngi la rai ba ka Tura Medical College kan dei beit noh ka Government Medical College. Ngi la pynsangeh ia ka jingthmu ban pyniaid da ka PPP mode”.
U Myntri ula kubur ia ki jingeh ha kaban thungkam ia ki nonghikai haba pynpaw ia ka jingduna ki doktor kiba kloi ban shim ia ka kam hikai.
“Ka jingeh ka long bad ki nonghikai, ki doktor ki ban ai jinghikai hangtei. Kane kan dei ka jingeh kaba khraw. Khlem pep na ka liang jong ngi, ngi la tynruh ia kane, hynrei khatduh kan shong ha ka jingdon ki nonghikai kiba ngin ioh” ula bynrap.
Ka jingthungkam ia ki nonghikai kala sdang mynta bad ka jingpyntrei ia ki jingtei kala jan dep artad.
Ka rai ban pynkylla ia ka Tura Medical College sha ka college ban pyniaid hi ka Sorkar kala mih namar ka jingjur ka jingdawa ki paidbah.
.){kind=link}