Shillong, K’lyngkot 13 : Ki Pulit ka East Khasi Hills, kila kem ia u Homeguard Volunteer, uba donkti ha ka jingbyrngem byrsit, kren ktien khlemakor bad dawa pisa haduh T.15000, na ki nong Cachar, Assam kiba wan kai sha Shillong, ha ka thain Madanriting.
Une u Homeguard Volunteer u kyrteng u Reganson Kharlor bad 35 snem ka rta, uba iarap pyniaid kali hapoh ka Madanrting Traffic Branch. Ia une u Homeguard la weng syndon na baroh ki kam ba u trei bad un sa ialam tian bishar ia u hapoh ka Iingkashari.
Kane ka kam be-ain une u Homeguard Volunteer kala paw pyrthei hadien ka jingthep ia ka video ha youtube da u Karan GoalaExpii (uwei na kiba ngat), kaba la pynsaphriang pat ha ki rynsan social media ba kynnoh pyrshah ia ki Pulit ka Shillong halor ka jingbyrngem, kren ktien khlemakor bad dawa pisa ba T.15000 namar ka jingpynkhein ia ka Traffic Rules.
U Superintendent of Police ka East Khasi Hills Bah Vivek Syiem u iathuh ba kane ka video kala saphriang ha ka 12 tarik Kyllalyngkot bad mar mar ki Pulit kila pynlong ia ka jingtohkit ia kane ka kam.
U iathuh ba kane ka jingjia kala jia ha ka 26 tarik Nohprah ha ka por 9 :35 baje mynstep bad u Reganson Kharlor u dei uba ngat pyndait klam ia ki kali ba pynkhein ain hapoh u pud u sam ka Madanrting Traffic Branch ha katei ka por.
U iathuh ba ka kali Maruti 800 ba don u nombor AS01-F-1460 haba leit sha ki thain Happy Valley, kala iaid na ka jaka ba don une u homeguard ha ki thain Sawlad bad jan ioh syllud ia u. Une u Homeguard ula kthong ia kane ka kali da ka kjat bad hadien da ka scooty ba iaid lynti bad ioh bat ia kane ka kali ha Iew Happy Valley bad kiew beit beit ha kane ka maruti.
U Bah Vivek u iathuh ba une u homeguard ula byrngem ia kine ki nong Cachar ba don ha kali bad dawa pisa haduh T. 1 lak. U iathuh ba kine ki briew kila panmap na une u homeguard uba la ialam pat ia ki sha Madanrting Taxi Stand ban dawa ia ka pisa ba T.15000 na ki arngut ki briew ba don ha kali, kiba la leit sei ia ka pisa na ka ATM ba marjan.
Ki Pulit kila register da ka suo motu case pyrshah ia une u homeguard ha Madanrting Police Station hapoh ka kyndon 308(5)/351 (2)/352 jong ka Bharatiya Nyaya Sanhita (BNS).
U Bah Vivek u iathuh ba ki Pulit kila dep phone ia kine ki briew ba ngat ha kane ka kam beain ba kin wan batai ia ka jingjia ban buh jingthoh (statement). U iathuh ba ia ki video CCTV ruh lah dep ban lum na ki katto katne ki jaka ban peit kumno kine kiei kiei baroh ki jia.
U ong ba ki Pulit ka East Khasi Hills bad ka Shillong Traffic Police ka iai ban ia ka jingaiti ha ka jingshakri ia u paidbah bad ka jingbat ia ka nongrim ban nym ailad ia kino kino ki kam dawa pisa, pyndonkam bakla ia ka bor lane kano kano ka jingleh tohmet.
