Agartala, Nailur 21 :U MLA ka Tripura u Brishaketu Debbarma ula shah pynkut noh na ka jinglong nongmihkhmat na ka assembly ka jylla.Ia kane la pyntip da u Lamphang ka iingdorbar ka Tripura u Ratan Chakraborty hynnin ka sngi ba Ar.
U Lamphang ka iingdorbar ula ong ba u Brishaketu Debbarma ula shah pynkut noh na ka jinglong dkhot hapoh ka assembly ka jylla namar ka jingpynkhein ia ki kyndon kiba iadei bad ka jingiehnoh kam.
“ U Brishaketu Debbarma uba dei u MLA na Simna constituency ha Tripura, ula phah ia ka shithi iehnoh kam jong u lyngba u nonglamktien, kaba long ka jingpynkhein ia ki kyndon ain,” ong u Lamphang ka iingdorbar ka Tripura, u Ratan Chakraborty lyngba ki lad pathai khubor hynnin ka sngi ba Ar.
U Brishaketu Debbarma ula phah ia ka shithi iehnoh kam jong u naduh u snem ba la dep kum kum MLA ka Tripura assembly.
U Debbarma uba dei u MLA na Shimna assembly constituency ula mih noh na ka IPFT, kaba dei ka party synrop jong ka sorkar ba la lamkhmat da ka BJP bad leit pyniasoh bad ka TIPRA kaba la lamkhmat da u Pradyot Kishore Debbarman ha une u snem ba la dep.
Khyndiat por hadien ba ula leit ban pyniasoh bad ka TIPRA, na ka liang u president ka IPFT ula phah da ka jingujor sha ka ophis jong u Lamphang ka iingdorbar assembly ka Tripura na ka bynta ban pynkhein noh ia ka jinglong MLA jong u Debbarma namar ka jingpynkhein ia ki kyndon treikam jong ka party.
Ia kane ka mat la pynsngew mynta lah kumba shi snem ei ei bad na ka liang une u MLA ula shah khot hajir ba u dei ban wan mih da lade hi hakhmat ka assembly kaba ula ialeh pyrshah.
U Lamphang ha ka jingpynmih hukum ka jong u, ula pynpaw shai ba ki sakhi satar kiba ula ioh pdiang ka la pynpaw ia ki jingshisha ba u Debbarma ula pynkhein ia ki kyndon treikam jong ka party IPFT bad ia ki kyndon treikam kiba iadei bad ki kam ialeh pyrshah party kumba la pynpaw da u hehduh ka IPFT, u NC Debbarma.
