Guwahati, Nailur 21 : U Myntri Rangbah (CM) ka Assam, u Himanta Biswa Sarma hynne ka sngi Balang ula pyllait ia ka jingiarap pisa kaba long kum ka bai lutksan sha ki longiing kiba la shah ktah ha ka jingshlei um hapoh Tezpur.
U CM ka Assam ula aiti ia ki cheque kiba mar T.1 lak sha kawei pa kawei ka longiing kiba ki iing ki sem jong ki kila shah pynjulor noh baroh ha ka jingshlei um kaba la jia ha kine ki khyndiat bnai ba la dep.
Baroh kila don haduh 308 tylli ki longiing ha baroh ki bynta ka Assam ki ban ioh pdiang ia kane ka jingiarap, kata hadien ba u CM ka jylla ula aiti ia kine ki cheque sha ki 44 tylli ki longiing hapoh Sonitpur district shibynta jong ka jingsdang ban pyllait ia kane ka jingiarap pisa na ka bynta une u snem.
Na ka liang u CM ka Assam hynnin ka sngi ba Ar ula plie ruh ia ka jingialang halor ka jingpyllait ia ka jingiarap pisa kaba T.25 hajar sha ki longkmie ki bym don kurim kiba la shah jied kyrpang hapoh ka skhim Indira Miri Universal Widow Pension Scheme ha ka jingialang ba la pynlong ha Collegiate Playground ha Tezpur.
Haba kren ha ka jingialang, u CM Himanta Biswa ula ong ba na ka liang ka sorkar jylla kala trei khlem shongthait na ka bynta ban kyntiew ia ka roi ka par hapdeng ki longkmie ha ka jylla.
Da kaba pynpaw ha kaba iadei bad ka Orunodoi scheme ha kaba ki nong ioh jingmyntoi kin ioh pdiang T.1250 man la u bnai, na ka liang u CM ka Assam ula ong ba kin dang kynthup sa ia kumba hynriew lak ngut ki nong ioh jingmyntoi hapoh kane ka skhim.
Nalor kata ula ong ruh ba hapoh ka skhim National Food Security kin don sa 10 lak ki longiing ki ban ioh card rashon.
Ula ong ruh ba kito ki longiing kiba la don ia ka card rashon ha ka jylla kin ioh biang sa kawei pat ka card lyngba ka sorkar jylla khnang ba kin ioh ia ka kabu ha kaba iadei bad ki lad jingsumar ki bym donkam siew ka ban kot haduh T.5 lak.
Haba kren ha kaba iadei bad ki rukom thungkam thung jam na ka bynta kiba aplai ha ki kam sorkar, u Sarma ula kam ba lyngba ka jingpyrkhing bad ka jinglong khuid ha kaba iadei bad ka rukom thung kam da ka sorkar, kiba bun na kito ki nong aplai kiba dei hok ban ioh kila ioh ban rung ha ki kam sorkar ha kine ki sngi kiba mynta.
Shuh shuh ula ong ruh ba ha kine ki 6-7 bnai ki ban wan, ka sorkar jong u kan thung kam biang sa ia kumba 1lak ngut ki samla ha ki kam sorkar.
