Shillong, K’lyngkot 12 : Ka All A’Chik Youth Welfare Society (AAYWS) kala pyrshah jur ia kano kano ka jingthmu ban shah ia ki bar jylla ba kin iakhun kum ki kyrtong ha ka elekshon ban wan ka Garo Hills Autonomous District Council (GHADC).
Ha ka kyrwoh, u President ka AAYWS Zingzing N Sangma ula ong “Ngi dawa jur ba tang ki kyrtong riewlum ba dei ban shah ba kin iakhun bad mihkhmat ia ki paidbah ha GHADC. Ka jingailad ban iashimbynta ki bar jylla kan pyntroin ia ka jingthmu jong ka jingsynshar laitluid bad ka lah ban lam sah ka jingshah pyniaid ki jaka puta ki riewlum ha ki briew ba nabar, ki ain tynrai, bad ki rukom synshar tynrai, ka bym lah ban pdiang satia da ka Jaidbynriew Garo”.
Ka Seng ka kyntu ia ki borkhmih bad ia ka Election Commission ba kan bat ia ka Sixth Schedule jong ka Riti Synshar ka Ri, bad pynthikna ba ka hok ki riewlum ka ioh jingiada.
“Ka AAYWS ka kyntu ia ki borkhmih bad ia ka Election Commission ba kin bat skhem ia ki kyndon jong ka Sixth Schedule bad ban pynthikna ba ym dei ban iapein ia ka hok ki riewlum trai ri trai muluk ha kano kano ka rukom ruh” ong ka kyrwoh.
Ka AAYWS ka kyrpad ia ki seng A’Chik bad ki nongshongshnong ba kin iatylli ha kaban iada ia ka jinglong laitluid ka GHADC haba ban jur “Ka GHADC Ka dei jong ki riewlum trai muluk ka ri-lum Garo bad ka dei ban hap beit hapoh ka jingialam jong ki riewlum”.
 kala pyrshah jur ia kano kano ka jingthmu ban shah ia ki bar jylla ba kin iakhun kum ki kyrtong ha ka elekshon ban wan ka Garo Hills Autonomous District Council (GHADC).){kind=link}