Shillong, K’lyngkot 08 : U President ka Meghalaya Pradesh Congress Committee (MPCC) Bah Vincent H Pala, ula kyntu ban long husiar bha halor ka jingtyrwa ka Sorkar ban bsut ia ki kyndon ka ILP ha ka Immigration and Foreingers’ Act 2025 ba thymmai bad pynpaw ba ka dang kloi palat ban kynthoh eiei khlem da iohi ia ka text jong ka Act.
“Ngi pdiang ia ka lada ka jingmyntoi u paid riewlum, hynrei tad haduh ba ngin da iohi ia kaei kaba ong ha ka Act, ka dang kloi palat ban kynthoh” ong u Bah Pala haba ban jur ia ka jingdonkam ka jingiamir jingmut u paidbah bad ka jingbishar.
“Ka lah ban dei kaba bha lane ka lah ban dei kaba sniew, ngim lah ban ong eiei tad haduh ba ngin da iohi ia ka jingtyrwa. Ha ka por ba ki thaw ia ka Ain, kin hap ban iakren bad u paidbah lane kin iathuh ia ka Law Commission ba kin thaw ia ka ain. Ka dei ka ain ka Sorkar Pdeng, yn sa iakren ia ka kumba ju long. Kumta, ngin sa peit kumno kane ka Act ka ong, hadien kata ngin sa lah ban ong eiei” ula bynrap.
Haba kylli ba ka Sorkar Jylla kala dep mynjur ia ka resolution ban pyntreikam ia ka ILP ha u snem 2019, u Bah Pala ula ong “Kato ka dei tang ka resolution ban pyntreikam hynrei phi hap ban thaw ia ka ain, phi hap ban thaw ia ka Act. Ka resolution ka dei tang ka kot shisla hynrei ka act ka iapher. Nga sngew ba ka dang kloi palat ban ong eiei khlem da iohi ia ka jingtyrwa”.
La ka Congress ka ihun ia ki sienjam ba ka Sorkar Jylla ka shim ban tehlakam ia ka jingrung kyrthep ki bar jylla bad ki mynder ri, u Bah Palaula pynrem ia ka BJP bad NPP namar ka jingbym lah ban pyndep ia ki jingkular, haba kdew ia ka ain tih dewiong bad ka ain khaii mrad bam doh kum ka nuksa.
“Ka BJP bad NPP kila pheil ha baroh ki kam. Kum ka nuksa, ha ka manifesto ki ong ba kin shah ban tih dewiong hynrei haduh mynta kim pat leh satia ia kata. Hadien kila thaw ia ka ain ba kumno kin khang ia ka jingkhaii masi lane ki mrad bam doh bad na kane, kila pynjynjar ia u paidbah”.
U Bah Pala ula pynpaw ia ka jingbym shaniah ha ki jingthmu jong ka BJP bad ong “Nga tharai kin sa taw ia ka ain ka ban pynmyntoi tang iala ki jong ki jaidbynriew bad nion bein ia kiwei pat ki Jaidbynriew”.
 Bah Vincent H Pala, ula kyntu ban long husiar bha halor ka jingtyrwa ka Sorkar ban bsut ia ki kyndon ka ILP ha ka Immigration and Foreingers’ Act 2025 ba thymmai bad pynpaw ba ka dang kloi palat ban kynthoh eiei khlem da iohi ia ka text jong ka Act.){kind=link}