Shillong, Nohprah 28 : Ka District Magistrate ka East Khasi Hills Kong R.M Kurbah kala pynmih ia ka hukum ba khang pyr shah ia ki artylli ki shnong ka District ba kin iapom dieng thang na ka jaka kaba don hapdeng ka jingiaknieh pud.
Kine ki shnong ki dei ka shnong Nonjrong bad ka Kut.
Haba pynjari ia ka kyndon 163 BNSS, ka DM kala ong ba ki jingtip kiba poi ba ki nongshongshnong na kine ki arshnong kila leit pomdieng na ka jaka ba iakajia, kaba lam sha ka jingiakynad hapdeng jong ki. Ka ong ba lada shah ia kane ka jingiapom dieng, ka lah ban lam sha ka jingkulmar ba pynthut ia ka suk ka sain.
Ka ong ba kano kano ka jingpynkhein ia kane ka hukum, kan khring ia ka jingtreikam ka kyndon 223 jong ka BNS bad kiwei kiwei ki kyndon kat kum ka jingi iahap.
Ia kane ka hukum la pynmih ha ka 27 tarik Nohprah bad kan treikam mardor tad haduh da pynmih da kawei pat ka hukum.
