Iai plie ka Sorkar ia ka jingkhang iakren iasuk bad ka HNLC | Smai ban leh tyngeh ia ki kam be-ain

Shillong, Nohprah 28 : U Symbud Myntri Rangbah ba khmih ia ka tnad kam Pohiing (Police) Bah Prestone Tynsong ula ban biang ba ka Sorkar ka dang iai plie beit ia ka jingkhang bad long ba kloi ban sdang biang ia ka jingiakren iasuk bad ka Hynniewtrep National Liberation Council (HNLC).

Ha kajuh ka por, ula maham pat ba ki bor ka Sorkar kin pyntreikam pyrrkhing bha ia ki ain pyrshah ia kino kino ki kam bymman bad kiba pynthut ia ka suk ka sain bala leh da kane ka kynhun hapoh ka Jylla.

Kane ka jingkynthoh kala mih hadien ka jingpynbthei bomb IED da ka HNLC, kaba la jia ha ka 15 tarik Nohprah hapoh ka phyllaw ka Dhar Construction Company, ha East Jaintia Hills.

“Haba iadei bad ki kam beain-la ka dei ka HNLC ne mano mano ruh- ka ain ka don ban leh tyngeh pyrshah ia kiba pynkhein ia ka suk ka sain, kam pher la ka dei ka HNLC ne mano mano ruh. Ka jingkhang jong ka Sorkar ka dang plie ia ka HNLC ba kan wan sha ka jingiakren iasuk. Lada phi dang leh ia ki kam bymman, ka Sorkar kan pyntreikam pura ia ki ain. Ngi long ba kloi ban iakren iasuk, ngi kyntu ia ka kynhun ba kan wan biang sha ka miej iakren” ong u Bah Prestone.

Halor ka jingbyrngem ka HNLC ia u Symbud Myntri Rangbah Bah Sniawbhalang Dhar, u Bah Prestone ula pynthikna ia ka jingpahara kaba khlain bad ba pura ia u Symbud Myntri Rangbah lem bad ia baroh ki nongshongshnong.

“Ngam tharai ba kum kane ka kam ruh dang hap ban kylli namar ka dei ka kamram jong ka Sorkar ban ai jingiada ia baroh ki nongshongshnong ka Jylla. Khamtam haba ngi iohi ba ka don ka jingbyrngem ia ka jingim, ngam tharai ba ngi donkam ban batai namar phi sngewthuh ba ngin ai ia ka jingiada kaba khlain. Na ka tnad Pulit, ngi lah leh ia ki kam ban pynkhlain ia ka jingpahara”.

Halor ka jingkam ba bun ki MLA na ri-lum Khasi bad Jaintia kila ioh pdiang ia ka shithi dawa pisa na ka HNLC, u Bah Prestone ula ong “Ia mynta, em, ngam top ba haduh katno ka dei ka jingshisha kane ka jingkam da kane ka Seng ba bun ki MLA kila ioh pdiang ia ki shithi dawa pisa. Hynrei, ka Sorkar bad ki Pulit kila kyrpad ym tang ia ki MLA hynrei ia kino kino ruh kiba ioh pdiang ia ki shithi dawa ba kim dei ban tieng hynrei ban pyntip sop sop sha ka Sorkar bad ki Pulit khnang ba kin ioh leh ia kaba donkam.

Halor ka jingkynnoh ka HNLC ba ka jingpynbthei bomb IED ka dei namar ka jingkyntait u Bah Sniawbhalang ban siew ia ka pisa ba dawa, u Bah Prestone ula pynshai “Ym don seng satia-la ki dei kiba la khein beain ne em-kiba lah ban ong ba phi hap ban siew ia kane ka pisa lane phi hap ban leh ia kane, leh ia katai. Kam don satia ka kyndon ia kane lait noh satang da don ka jingiasngewthuh jingmut hapdeng ki ar mamla. Ka jingdawa pisa hi ka dei ka kam beain, bad ka Sorkar kam don jingtip la u Symbud Myntri Rangbah Bah Sniawbhalang Dhar ula pyntip ne em sha ka Sorkar ba u ioh pdiang ia ka shithi dawa pisa”.

Ula bynrap “Ka HNLC nyngkong kala kam ba u Bah Sniawbha ula siew ia ka pisa bad mynta une u juh u briew um siew pisa shuh-ta ka daw ngam lah ban ong eiei halor kane- hynrei kum kine ki kam ngi shim ba ka dei ka kam dawa pisa jubor bad ngin nym ailad ia ki kam dawa pisa ba kin don hapoh ka Jylla”.

Ha kajuh ka por, u Bah Prestone ula pyntip ba ia mynta ki Pulit kim pat shym la kem briew shuh halor kane ka jingjia pynbthei bomb IED ha Dhar Construction Company.