Shillong, Nailur 20 : Ka Iingkashari Special Judge (POSCO), Khliehriat, East Jaintia Hills, hynne ka sngi ba-ar ka la hukum ban set along haduh 10 snem ia uwei u runar uba rahbor bad leh beijot ia iwei I Khynnah ba dang 6 snem ka rta.
Une u runar u kyrteng u Binod Tamang uba la shah kem bad shah pynngat hapoh ka kyndon 363 IPC pule lang bad ka kyndon (m)/6 jong ka POCSO Act, 2012.
Kat kum ka hukum, une u runar ula rahbor bad leh beijot ia ine I Heprit ha ka 6 tarik Jylliew 2018 bad u dei ruh u briew uba iajuh iajan bha bad ka Longiing jong ine I Heprit.
U Additional Superintendent of Police ka East Jaintia Hills u la pyntip ba ia kane ka case la register hapoh Khliehriat bad la kem ia une u runar da I Kong O Tyngkan I/c ka Women Police Station, iba la pyndep ia ka chargesheet hapoh ka por bala buh bad la phah sha ka Special Court ban tian bishar.
Ka Iingkashari Special Judge (POCSO) Khliehriat hynne ka sngi kala pynmih ia ka hukum ban set along haduh 10 snem ia une u runar bad ka jinghap siew ia ka kuna ba T.10000 nalor ban siew ia ka bai lutksan ia ine I heprit kaba long haduh T. 3 lak.
