Guwahati, Nohprah 23 : Ka jingpang kaba don jingiadei bad ki jingshlei um bad ki rud duriaw, kila paw shynna mynta ba don ruh ha ki ri-lum Khasi ka Jylla Meghalaya.
Ka jingwadbniah ka kynhun ki doktor, kala pynthikna ia ka jingdon ka jingpang Leptospirosis ha ki briew ha Meghalaya, kaba buh ha ka jingeh ban ngeit ba ka Jylla kaba khriat, ki jaka lum kin lah ban don ia kum kane ka jingpang.
Ka jingpang Leptospirosis ka dei ka jingpang ha ka snam kaba ioh na ki khniang Leptospira, kaba lah ban ibit ia ki briew, ki ksew, ki khnai bad bun ki mrad khlaw bad ki mrad ba ri haiing. Ki dak jong kane ka jingpang ki lah ban dei naduh ka kingkhlieh, pang ki ksah bad khie shit haduh ka jingphlei snam ki tor lane meningitis. Ki briew bala pang jur ki lah ban poi sha ka jingpang Joundice, jingbym treikam ki khyllai bad phlei snam.
Ka jingshem, bala pynmih ha ka Indian Journal of Medical Research, la buh jingthoh ia 10 tylli ki case bala pynthikna, kiba la suba ha Shillong ha u snem 2023, kaba dei ruh ka sien ba nyngkong ia ka jing don ka jingpang Leptospirosis ha ki jaka lum ki bym shlei um kum ka Meghalaya.
Ia kane ka jingwad bniah la leh da ka Tnad Public Healt, Indian Institute of Public Health Shillong.
“Kat kum ka jingtip jong ngi, kane ka jingwad bniah ha ka sien ba nyngkong la pynthikna ia ka jingdon ka jingpang Leptospira spp. ha Meghalaya. Ka jingioh pang ki briew lehse kam poi sha ka jingtip namar ka jingduna ka jingsuba da ki nongsumar ba kan don ha ki jaka lum” ong ki nongthoh.
Kila pyntip ba ka Leptospirosis ka dei ka jingpang kaba ju ioh ha ki jaka ba shlei um bad ki rud duriaw, bad ki jaka lum bad ki jaka ba jngai na ki duriaw kim ju kham ioh satia.
Ka jingpang Leptospirosis ka dei kaba lah ban saphriang na ki mrad sha ki briew lyngba ka jingioh ktah ia ki um pynjhlieh, ka khyndew ba leit pynjhlieh ki mrad lane ka um.
Ka Meghalaya, watla ka ioh bun eh ka umslap ha ka pyrthei, ka dei kaba la khein kum ka Jylla kaba duna eh ka jingshlei um, kaba pynlong ia kane ka jingshem kaba kham phylla.
Ki doktor ki ong ba ki daw kum ka jingshong sngem ka khyndew, ka jingdon ki khnai, bad ka jingbym biang ki nala ka lah ban ailad ia ka jingpang ban saphriang jar jar ha ki jaka lum.
Ki nongpang-kham bun ki shynrang kiba don hapdeng ka rta ba 27 snem- ki dei kiba trei kam bapher bapher kynthup ki nongbyllasngi, ki nongtrei Ophis bad ki Nongrep.
Katto katne ki ioh ia ka jingpang kum ka khie shit bad prie, saw ngut kila ioh ia ki jingpang kiba jur kynthup ka jingbym treikam shuh ki khyllai, ka jingpang jaundice kaba jur bad ka jingshitom ban ring mynsiem kaba hap donkam ia ka jingkyrshan ki ventilator.
Baroh ki nongpang kila lait um hadien ka jingsumar kaba la leh thikna bha ha ki hospital kiba heh ha Shillong.
Kawei na ki jingeh ba hakhmat eh ban ithuh ia ka jingpang Leptospirosis ka dei namar ka dei ka jingpang lyiur kaba iasyriem kum ka dengue, malaria bad ka jingioh pang shitmet.
Ki doktor ba don bynta ha ka jingwad bniah ki maham ba ha ki Jylla lum kum ka Meghalaya, ka jingpang Leptospirosis ka dei kaba kham niar eh ban suba, kaba lam sha ka jingpynslem ban ioh ia ka jingsumar, kaba lah ban pynkylla ia ka jingsumar ba lah ban pynkoit sha ka jingma ia ka jingim. Ka jingsumar ba dang kloi da ki dawai antibiotics kum ka doxycycline ka shongdor tang T.50.
Hynrei shisien bala kiew hospital, ki nongpang kin hap ban pynlut hapdeng T.20,000 haduh T. 1.4 lak, kham bun na ka pla lajong.
Ki nongwad bniah ba don bynta ha kane ka jingiawad bniah, kila ai jingmut ban don ka jingpynshai bad pynsngewthuh kaba khlain hapdeng ki doktor, bad kumjuh ruh ia ki paidbah ha ka por lyiur bad hadien ka lyiur.
