Imphal, Jylliew 10: Ia ka met iap jong ki 6 ngut ki Naga ba la ngeit ba ki dei kiba shah rahbor na Leilon Vaiphei kaba hap ha Kangpokpi district jong ka Manipur, la ioh tam ha ka sngi Balang hadien ka jingkhynra kaba jur.
La rahbor ia kine ki Naga ha ka 13 tarik u Jymmang da ka kynhun kieng atiar bym lah ban ithuh bala suba jur ba ki dei ki Kuki.
“Hadien 24 kynta duna ka jingiawad kaba la pynlong da kumba 450 ngut eiei ki pulit ka Manipur, ki Central Reserve Police Force (CRPF) bad ki Assam Rifles, la lap ia ka met jong ki hynriew ngut kiba shah rahbor,” ong uwei u heh ophisar.
Shisngi shuwa kane, ki kynhun ki Naga kila pynlait noh ia ki 14ngut ki Kuki ba ki set kum ka jingpynphai kyllang ia ka jingshah rahbor ki 6 ngut ki Naga, bad ia kine ki briew la aiti sha ki bor synshar district ka Senapati lyngba ka jing tuklar jong ka United Naga Council (UNC).
Kane ka jingrahbor ka la jia hadien ka jinghiar thma ba shyrkhei jong ki kynhun kaikhlaw ha Kotlen ha ka 13 tarik Jymmang. Hadien kane ka jingjia la kynnoh ba 18 ngut ki Naga na ka shnong Konsakhul, Kangpokpi district ki la shah rahbor ha ki kynhun Kuki ha Leilon Vaiphei. Kum ka jingpyn phai kylla, ki kynhun Naga ki la kem ia 28 ngut ki Kuki.
“Ka jingiarahbor markylliang hapdeng ki ar kynhun ka la pynbor ïa ki bor pahara ban tuklar bad hadien ka jingïakren hapdeng kine ki ar kynhun, la pyllait noh ïa 14 ngut ki nongshah rahbor Kuki. Hynrei mynta ka sngi hadien ka jingwad bniah, ngi la lap ïa ki met ïap jong ki hynriew ngut ki nongshah rahbor” ong ki Heh Ophisar.
“Kadei ka sngi ba sngewsih na ka bynta jong ngi baroh. Ngi la pyrshang ban pyllait im ia ki mynsiem briew hynrei kane ka jingiakynad hapdeng ki ar kynhun ka a kylla khongpong. Ka jingsuk ka dei ban jop bad ki briew ki dei ban sngewthuh,” ula ong.
