Guwahati, Nailur 20 : Halor ka mat kaba iadei bad ka jingai ia ka bhah Scheduled Tribes (ST) sha ki jaitbynriew rit paid bapher bapher ka Assam, na ka liang u Myntri ka tnat pule puthi u Ranoj Pegu hynnin ka sngi Nyngkong ula pynpaw hapoh ka dorbar assembly ba ka jingshim rai ba khatduh halor kane ka phang kan wan lyngba ka sorkar pdeng.
Une u myntri ula ong ba ka mat kaba iadei bad ka jingpynioh ia ka bhah ST sha ki hynriew kynhun ki jaidbynriew rit paid ka Assam ka dang don hapdeng ka jingbishar bniah da ka sorkar pdeng.
Haba kren ha ka dorbar synrai jong ka Assam Assembly, u Pegu ula ong ba napdeng ki 98 ki kynhun rit paidbah jong ki thain jaka rep slasha ha ka jylla, 36 na kine la pynkhreh ban pynioh ia ka bhah scheduled tribe.
Nalor kata u Pegu ula pyntip ruh halor ka song jingiarap kaba T.500 klur na ka bynta ban kyntiew ia kine ki kynhun nongshong shnong rit paid, ha kaba kawei kawei na ki kynhun jaidbynriew kin ioh ia ka bhah kaba mar T.25 klur.
Une u myntri ka sorkar Assam ula ong ba halor kane ka bynta la thaw ruh ia ka development bad autonomous councils na ka bynta kine ki kynhun nongshong shnong. Hynrei, ha kaba iadei bad ka jingshim rai ban pynbna ia ka bhah scheduled tribe kane ka shong ha ka sorkar pdeng.
Lah ban kdew ba ha kaba sdang jong une u bnai, na ka liang ka sorkar pdeng kala shim ia ka rai ban kynthup ia ki jaidbynriew rit paid bapher bapher hapoh ka list ST na ki santylli ki jylla, kata ka Chhattisgarh, Tamil Nadu, Karnataka, Himachal Pradesh bad Uttar Pradesh.
Ka jingshim rai ha kaba iadei bad kane ka bynta la shim ia ka jingialang ka kynhun myntri ka sorkar pdeng hapoh ka jingialam jong u Myntri Rangbahduh (PM) ka ri u Narendra Modi, bad ia kane la pdiang sngewbha da kitei ki jylla.
Hapoh Assam, ha kawei pat ka bynta, na ka liang ka seng Matak Youth Students’ Council bad kiwei pat ki seng samla pule kila pynlong ka jingiakhih hadien katei ka jingshim rai jong ka sorkar pdeng, kata namar ka jingbym kynthup ia ki nongshong shnong napoh Assam ha katei ka list pynbna ST bathymmai ka sorkar pdeng.
