Santosh Trophy | Liem ka Meghalaya da 2-1 kol ha ka Sikkim

Shillong, Nohprah 19 : Ka jingap khmih lynti baroh ka la poi noh sha kaba kut hadien ba ka Meghalaya ka la shah pynliem hakhmat ka Sikkim da 2-1, ha ka jingialehkai ba nyngkong jong ka Group E Senior Men’s National Football Championship ka  Santosh Trophy 2025-26 (preliminary round), ba long ha madan jong ka SSA Stadium, First Ground, Polo hynne ka janmiet.

Haba phai sha ka jingiakhun, ka stadium ka la khie im hadien ba u kapten ka Meghalaya u Hardy Cliff Nongbri, u la lam khmat ia ka kynhun ban thep ia ka shi kol ha ka minit kaba 19.

Pynban hadien ba la shah thep kane ka shi kol, ka Sikkim, kam shim la randien, ka la ieng ba kan iakhun tyngeh bad ruh ban iai ap ia ka kabu lano ba maka ruh kan ioh lem ia la ka jong ka kabu ban pynphai ia kane ka shi kol ba ka la shah tam, kaba haduh ba kut jong ka kylla step,. ka Meghalaya da ka jingkmen ka la lah shwa ban iai tam da kane ka shi kol.

Haba wan ban bteng ia ka kylla miet, ka Sikkim, ka la  kyntiew ia la ka rukom ialehkai ka jong ka,  ha kaba kynsan kynsan ka la lah syndon ban ioh ba kan thep ar kol, ha kaba ka kol kaba nyngkong la khyrwit ia ka da u Boxer Pradhan (68′) bad ia ka kol kaba ar la thep da u Surag Chettri (71′).

Haba phai bad khmih sha ka kynhun ialehkai jong ka Meghalayta, ba coach ia ka da u bah Khlain Pyrkhat Syiemlieh, lah ban ong ba kam dei satia ba kan mad ia kane ka namrem, ha kaba ki player ba la jied ha kane ka kynti, dei shisha ki rang ialehkai kiba tbit bad ba da kynsai bha.

Pynban  ka jingdon  kum kine ki player ha kane ka kynhun, lah ban ong ba ka shu long shisha tang ha ka sla kot jingthoh, hynrei ha madan, kum ka kynhun, ka Meghalaya ha kane ka jingiakhun bad ka Sikkim, ka da dum shisha katta ka buit ka bor ialehkai ka jong ki, katno tam lei lei ba kam don satia katta ka jinglahg ban ia mir jingmut bha hapdeng ki player, bynrap da ka jingbym lah ban ia pynbuh ne ban ia pashat bha ia ka bol, kaba ka nuksa jong  kane ka dei ka jingnshah thep ka kol kaba ar.

Ha ka kylla miet, u bah Khlain u la buji haduh san ngut ki player ba kynthup  wat ia u kapten jong ka kynhun katta ia u Hardy Cliff.

Ha kane ka janmiet jong ka jingiakhun, u Nister Roy Suting, kumba la bynshet ha u ia ka kamram ban ieng ap ia ka kol, u la pynpaw biang ia ka buit bad ka sap ialehkai ka jong u, kaba ui la lah ban kyrda (save) ia ki kato katne ki bol kiba la khyrwit da ki rang ialehkai ka Sikkim bad  kawei lei lei kadei hajan bha jong u.

Hynrei kaba kut hi ka long ba ki rang ialehkai jong ka Meghalaya ha kane ka janmiet kim shim la lah ban ialehkai kumba la ap khmih lynti ia ki tad haduh ba kin da mad ia kane ka jingshah rem.

Kumba ka long, yn don tang kawei ka team ne ka jylla kaban jam shakhmat ha kane ka lympung na kane ka group, ha kaba ka Sikkim da kane ka jingjop kaba hynne ka janmiet ia ka Meghalaya ka don ha ka lynti jong ka thong ban lah ban jam shakhmat, hynrei shwa ia kane kan shong pat na ka jingiakhun kaban wan ka jong ka pyrshah ia ka Arunachal Pradesh kaban long ha ka 21 tarik.

Shwa ban sdang ia kane ka jingiakhun, la hiar ai mynsiem bad kitbok ia ki rang ialehkai jong baroh artylli ki jylla da u Symbud Myntri Rangbah ka jylla u bah Sniawbhalang Dhar bad synran lang ia u da u President bad Secretary ka MFA bah Hamletson Dohling bad bah Sunesh M Syiem.