Shillong, Nohprah 19 : Ka Kynhun Myntri ka Sorkar Jylla kala mynjur ia ka curriculum ka Jylla na ka bynta ka kyrdan ba sdang jong ka jingpule, da kaba wanrah ia ka syllabus ba thymmai naduh ka preschool bad klas-I, ha ryngkat bad ki kot ba thymmai. Kane ka curriculum ka pynlong kongsan ia baroh ki khynah ba kin pule ia ka ktien Khasi bad Garo.
“Ka Kynhun Myntri kala mynjur ia ka state curriculum ba thymmai na ka bynta ki khynnah rit. Ngi la mynjur ia ka syllabus jong ki preschool bad klas-I bad yn wanrah noh ia ki kot pule ba thymmai” ong u Myntri Rangbah Conrad K Sangma haba iakren bad ki lad pathai khubor hadien ba pyniaid ia ka jingialang hynne ka sngi Thohdieng.
Ula bynrap ba kane ka jingpynbeit thymmai kan pynleit jingmut eh ka jingtei ia ka jinglong, ban pynrung ia ka akor ka burom bad ban ai jinghikai halor ka kolshor bad ka histori hapdeng ki khynnah pule ba dang rit.
Baroh ki khynnah kin hap ban pule ia ka ktien Khasi bad Garo.
“Ngi la pynlong kongsan ia man ki khynah ba kin pule ia ka ktien Khasi bad Garo” ong u Myntri Rangbah haba pyntip ba ki kot na ka bynta kine ki artylli ki ktien kila dei shibynta jong ka curriculum.
Watla kila don katto katne ki skul kiba la shim ia kane ka syllabus na ka bynta u snem pule ban wan, ia ki kot pule ba pura yn sa pynlong kongsan naduh u snem ban wan. Ia mynta u snem, ki skul ki lah ban jied da ka mon lada ban pyndonkam ia kine ki kot pule ba thymmai.
“Mynta u snem ngin ym pynlong kongsan hynrei ki skul ki lah ban jied hynrei naduh u snem ban wan, kan sa long kongsan ia baroh” pynshai u Conrad haba bynrap “Ia kane ngi la mynjur da ka jingialang ka Kynhun Myntri bad ngin sa pyniaid noh ia ka kam”.
