Shillong, Nohprah 19: Ka Supreme Court Collegium ka la ai jingmut ban thung ia ka Justice Revati P Mohite Dere jong ka Bombay High Court kum ka Chief Justice ba thymmai ka Meghalaya High Court.
Ia kane ka rai la shim ha ka jingialang jong ka Collegium kaba la long ha ka 18 tarik Nohprah 2025 bad ka Justice Revati P Mohite Dere kan dei ka ba ar naki kynthei ban long Chief Justice jong ka Meghalaya High Court.
Ka Justice Dere mynta ka dei ka nongbishar ba-ar ba la rangbah tam ha Bombay High Court.
La kha ïa ka Justice Revati P Mohite Dere ha Pune bad ka la pyndep ïa ka kyrdan First Class Distinction ha ka LL.B na ka Symbiosis Law College, da kaba ïoh ïa ka kyrdan kaba ar ha ka thup jong ka Merit List University of Pune.
Hadien kata ka la ioh ia ka LL.M na ka University of Cambridge, UK, kum ka nongïoh ïa ka scholarship ba pawnam jong ka Cambridge Commonwealth Trust.
Ka Justice Dere ka la sdang ïa ka kam ha Chamber jong u kpa jong ka, u Senior Advocate Vijayrao A. Mohite, ha Pune, bad hadien ka la trei bad u Barrister Raja S. Bhosale ha Mumbai. Ka la trei shitom bha ha Bombay High Court and Sessions Court ha kaba ka la pyniaid ia ki kam criminal, civil bad constitutional.
Shwa ban poi sha kane ka kyrdan, ka Justice Revati P Mohite Dere ka la shakri ha ki katto katne ki kam ba kongsan jong ka Sorkar, kynthup kum ka Additional Public Prosecutor bad Senior Counsel na ka bynta ka Union of India, bad ka Government Pleader & Public Prosecutor na ka bynta ka Jylla Maharashtra.
La thung ïa ka kum ka Additional Judge jong ka Bombay High Court ha u snem 2013 bad ka la long kum ka nongbishar ba pura ha u snem 2015.
