Shillong, Nohprah 19: U Myntri Rangbah ka jylla Conrad K Sangma ha ka sngi thohdieng ula ong ba ka sorkar kan shu sngap ia ki kam beain jong ka kynhun kieng atiar ba la shah khein beain-ka Hynniewtrep National Liberation Council (HNLC) hadien ka jingpynbthei bomb IED hapoh ka Dhar Company ha Shymplong, East Jaintia Hills district.
Ka HNLC kala kam ia ka jingkitkhlieh halor kane ka jingpynbthei bomb bad pynpaw ba kala pynlong sohpdung ia ki nongkynti u Symbud Myntri Rangbah ka Jylla Bah Sniawbhalang Dhar namar ka jingkyntait ban siew ia ka pisa ba dawa da ka seng.
Haba kylli halor ka jingsngew jong u bad ka jingdon ki riew sain pyrthei kiba la iohpdiang ia ka shithi dawa pisa, u Conrad ula ong “Ngam don ia ki jingtip bad nga, mynshwa kila ong ba u ju siew bad mynta ki ong ba um ju siew shuh, kane ka long kaei kaei kaba sngew kyllain khyndiat”.
Ula pynthikna ba ka sorkar kan ym pdiang bad shu sngap ia kum kitei ki jingleh bad ba ki pulit ki lah dep lum bun ki sakhi bad ki sabut ban shimkhia ia kane.
“Ki pulit kila pynwan ia ka case kaba khlain bad kila don bun ki jingtip bad bun ki sabut. Nga ngeit skhem ba ki pulit kin sa pyntip sha phi lashai ka sngi. Kila leh ia kaba donkam, ki pulit ki lah shimkhia mardor bad kito kiba donkti kin sa shah kem” ong u Sangma.
Ki Pulit kila kem ia arngut ki nongtrei jong ka HNLC ha ka 18 tarik Nohprah kiba donkti ha kane ka jingpynbthei bomb bad kine ki arngut kila phla ruh ba dei ma ki, kiba leit buh ia u bomb.
 hadien ka jingpynbthei bomb IED hapoh ka Dhar Company ha Shymplong, East Jaintia Hills district.){kind=link}