Shillong, Nailur 19: Ka KSU NEHU Unit hynne ka sngi Nyngkong, ka la dawa ia u Nodal Officer ba khmih iaka UPSC Free Coaching Class ba u dei ban ai bhah lang ia ki samla trai muluk ba kin ioh iaka Coaching lem kumta ka seng kan pyrshah jur ban pynlong ia katei ka Coaching Class ha skulbah NEHU.
U General Secretary ka KSU NEHU Unit u samla Shibaitlang Rymbai u la iathuh ba ka seng kala leit ai da ka jingthoh ha u Nodal Officer ba dei peit kyrpang ia ka free coaching class na bynta ki samla pule Schedule Caste ban long hapoh NEHU bad ka seng kala ban jur ba dei ban ai bhah lang ia ki samla pule ST khamtam iaki samla pule trai ri trai muluk, lem kumta kin pyrshah ban pynlong ia katei ka coaching class.
Ka KSU kala pynkynmaw, ba u Vice Chancellor jong ka NEHU ula soi ia ka MOU bad ka DACE ha ki bnai ba lah dep bad mar mar ka seng ka lah leit ban iakren bad u VC halor kane ka bynta bad ula kular tang da ka ktien ban pynrung lang ia ki samla ba dei Schedule Tribe ha kane ka bynta.
U Samla Shibaitlang u la ong, ka seng ka khlem ioh da kano kano ka jingthoh na u VC, kumta kala leit ban ai da ka jingthoh ha u Nodal Officer khnang ba yn ioh ban phah sha ka sorkar pdeng ban pynsngew ia ki jingdawa jong ka seng bad ula kular ruh ba un iakhun ban pynioh bhah lang ia ki samla pule kiba dei ki riewlum khamtam ia ki trai ri trai muluk.
Ka KSU kala pynpaw ba kam pyrshah ia kane ka MOU kaba la iasoi bad ka DACE hynrei ka pyrshah jur lada ki samla pule Khasi kim ioh bhah lang bad ka seng kan ieng pyrshah beit lada kim lah ban pynurlong ia ka jingdawa.
