Shillong, Nohprah 15 : Ka Iingkashari Meghalaya High Court kala bthah ia ka Sorkar Jylla ban pynmih ia ka jingpynbna jong ka Pension Scheme na ka bynta ki nongtrei jong ki College deficit hapoh ka saw taiew, haba ban jur ba kano kano ka jingpynkylla kan ktah ia ka jingmyntoi jong ki nongtrei.
Ka Iingkashari kala pynmih ia kane ka hukum haba shong bishar ia ka mukotduma bala mudui da ka Meghalaya College Teachers Association (MCTA) bad kawei pat da ka Greater Phulbari Area Deficit School Retired Teachers & Employees Association, kaba dawa pyntreikam ia ka Pension Scheme.
Ka Sorkar Jylla kala pyntip sha ka Iingkashari ba kala dep thung ia u Portfolio Manager bad la phah ktien ia ka jingai jingmynjur ba un leit sei ia ka pisa bad ba la dep pynkhreh ia ka draft Pension Scheme.
“Ngi bthah ia ka Jylla ba kan pyndep noh ia ka jingpynkhreh ia kane ka scheme bad ban pynmih khlem pep ia ka jingpynbna jong kane ka Pension Scheme hapoh ka saw taiew naduh mynta ka sngi” ong ka division bench ba kynthup ia u Chief Justice Soumen Sen bad Justice HS Thangkhoew ha ka hukum ba pynmih ha ka sngi Nyngkong.
Kala hukum ruh ia ka Sorkar Jylla ban aiti ia ka kaiphod bala pyntreikam ia kane ka jingbthah ha ka 28 tarik Kyllalyngkot, 2026.
