Pynkha ka Sorkar ia ka UWTF bad CIJW ban pynkhlain ia ki kam iakhun riewkiengatiar ha Jylla

Kyntiew kyrdan ka Tnad Pohiing ia ka Byrnihat OP sha ka Police Station

Shillong, Nohprah 15 : Ka Sorkar Jylla kala pynbna paidbah ban pynkha ia ka Urban Warfare Training Facility (UWTF) bad ka Counter Insurgency & Jungle Warfare (CIJW) School ha Jylla, ban pynkhlain ia ka tnad Pulit ha ka jingiakhun ia ki riewpyntriem/riewkiengatiar ha Jylla.

Kat kum ka jingpynbna bala pynmih da ka Tnad kam Pohing (Police), ia ka Urban Warfare Training Facility (UWTF) yn pynkha ha SF-10, Mawiong.

Kane ka jaka ai jinghikai kan pyniaid ia ki jinghikai naduh ka basic Close Qauater Battle (CQB ) ne ka jingiakhuh marmet, haduh ka jingpynkhuid ia ki riewbymman na ki iing kiba bun mala, ka jingpynlait im ia ki nongshah rahbor, ka jingpynkhlain ia ki ladpeitngor ha sor. Kane ka jaka kan pynkhlain ia ka jinglah ka Jylla, pynduna ia ki jingma ia ki kynhun nongkhynra bad pynjanai ia ka jingiatreilang hapdeng ki Agency.

Ka jingpynbna ka Tnad kam Pohiing ka pyntip ruh ia ka jingpynkha ia ka Counter Insurgency & Jungle Warfare (CIJW) school ha Baghmara, South Garo Hills, Meghalaya ban ai ia ki jinghikai pyntbit ha ka jingiakhun ia ki kynhun kiengatiar bad ka sap ialeh thma ha ki jaka khlaw sha ki Pulit ka Jylla bad ki Commando nalor ban ai jinghikai ia ki Unit ba kyrpang.

Nalor kane, ka Tnad ka pynbna ruh ia ka jingpynkha ia ka Police Station ha Byrnihat, Ri-Bhoi District ka ban tip kum ka Byrnihat Police Station.

U pud treikam jong ka Byrnihat Police Station ki long ka Jorabat Outpost (Assam) sha ki bynta ba shatei, Umsning Outpost/Sonapur Police Station (Assam) sha Mihngi, Nongpoh Police Station sha ki bynta ba Shathie bad Khanapara Police Station sha ki bynta Sepngi.