Shillong, Nohprah 15 : Ka Khasi Jaintia Deficit School Teachers’ Association (KJDSTA) kala dawa ia ka Sorkar Jylla ba kan pynkiew noh ia ka Dearness Allowance (DA) jong ki nonghikai skul deficit sha ka 51%, ka ban iahap kat kum ka jingsiew ia ki nongtrei Sorkar, nalor ban pynlait noh ia ki arrear.
Ia kane ka rai la shim ha ka jingialang jong ka Association ba long ha madan Malki ha ka sngi Nyngkong.
Ha ka shithi sha u Myntri Rangbah ka Jylla Conrad K Sangma, u President ka KJSTA Bah Boswell S Pala ula pynpaw ba da ki hajar ngut ki nonghikai deficit kila mad ia ka jingeh kaba jur ha ka liang ka pisa tyngka bad ha ka bor pyrkhat pydain namar ka jingsahkut sah hajuh ka jingsiew jong ka DA ba long 43%.
“Ngi dawa jur ia ka Sorkar ba kan leh eiei bad rai mardor ha kaban pynkiew ia ka DA jong ki nonghikai deficit ka ban long katjuh bad ki nongtrei Sorkar bad ban pynlait noh ia ki arrear jong ka DA ba pynkiew ha ki snem bala dep” thoh u Bah Pala.
Kane ka seng kala aipor ia ka Sorkar haduh ka 15 tarik Kyllalyngkot 2026 ba kan pynurlong ia ki jing dawa, haba byrngem ban pynlong ia ka jingiakhih lada kam urlong.
Ka KJDSTA kala kyrpad ruh ia u Myntri Rangbah ba un tuklar halor ki katto katne ki kam ba kyrkieh kynthup ka jingpyntreikam ia ka Centralized Provident Fund System, pynlait ia ka Death-cum-Retirement Gratuity (DCRG) sha ki nonghikai bala shongthait bad ban pynthikna ia ka MEGH-SIMS portal kabym don jingbakla bad ba ioh ei.
Ka Sorkar Meghalaya dang shen kala pynbna ban pynkiew 2% ka DA sha ki nongtrei, kaba kyntiew ia ka jingsiew sha ka 51%, ka ban treikam naduh ka 1 tarik Naitung 2025.
Hynrei, ki nonghikai deficit ki dang iai bteng ban ioh tang 43% ka DA, kaba la pynbor ia ki ban pyrshah bad dawa ia kajuh ka jingsiew.
 kala dawa ia ka Sorkar Jylla ba kan pynkiew noh ia ka Dearness Allowance (DA) jong ki nonghikai skul deficit sha ka 51%, ka ban iahap kat kum ka jingsiew ia ki nongtrei Sorkar, nalor ban pynlait noh ia ki arrear.){kind=link}