Shillong, Nohprah 11 : U President ka UDP bad Myntri Sorkar Bah Metbah Lyngdoh ula kyntait ban kynthoh eiei halor ki khubor ba don ki kynrum kynram hapoh ka party namar ka jingbujli Myntri Sorkar dang shen, da kaba ong ba kane ka dei ka kam pohiing ka party.
Haba kylli halor ki jingkren u MLA ka UDP na West Shillong Bah Paul Lyngdoh ba ong ba ki don katto katne ki kynhun ha ka Party ki bym sngewtynnad ia ka rukom leh halor ka jingbujli Myntri Sorkar, u Bah Metbah ula ong “Ngam don eiei ban ong ia kaei kaba ki briew ki iakren shabar….nga kwah ban ong ba kano kano, lane kano kano ka jingsngew,ki dei ban pynpaw markhmat ha ka rynsan”.
U Bah Metbah ula ban jur ba um kwah ban kynthoh eiei halor ki kam pohiing ka party. “Halor kiwei pat ki party, ia kane ruh ngam don eiei ban ong” ula ong.
Wat hapdeng kine ki khubor ba don ka kynrum kynram hapoh ka Party, une u Nongialam ka UDP ula pynpaw ia ka jingsngewskhem ba ka party jong u, kan sa lehbha ha ka elekshon 2028, bad antad ba kin ioh palat arshah ia ka jingioh MLA na ka elekshon 2023.
Halor ka elekshon GHADC, u Bah Metbah ula ong ba ka party kan dang ban shim rai ia ki buit treikam. “Haba phai sha ka GHADC, ngi don ia ka kynhun ki nongialam ka party ha ri-lum Garo…kin dang ban ai sha ngi ia ka rai, hynrei kaei kaba paw lehse ngi lah ban pynieng kyrtong na ki katto katne ki constituency” ula ong/
Une u Nongialam ka UDP ula pynpaw ba ka party kan sa shim ia ka rai ba khatduh halor ka elekshon GHADC ha ki taiew ban wan.
