Shillong, Nohprah 11 : U Myntri Rangbah ka Jylla Conrad K Sangma ula pynshai ba ka jingpynlip bording khah khah ha kylleng ki jaka jong ka Jylla, kynthup ka Shillong, Tura bad Jowai, kam dei satia ka Load Shedding hynrei ka jingpynlip bala pynbeit ryntih da ka jingthmu ban pyntreikam ia ka Revamped Distribution Sector Scheme (RDSS) ba T. 900 klur.
“Ha kine ki sngi bala leit, nga la ioh pdiang ia ki khubor (message) na ki paidbah halor ka jingpynlip bording khah khah…nga kwah ban pynshai sha ki paidbah ba kane kam dei satia ka load shedding, kane ka dei ka jingpynlip bala pynbeit ryntih” ong u Sangma ha ka kyrwoh lyngba ka dur khih hynne ka sngi Palei.
Kane ka jingpynlip bording ka long kaba kongsan ban pyntreikam ia ka skhim RDSS, kaba donkam ban bujli lane pyndait ia ki 2600 tylli ki transformer ba thymai, bujli ia ki waiar rim ba 3800 km bad ban pyniaid ia ka lain thymmai ba 4300 km.
“Ngi la shimkhia ba ngin pynduna ia ka jingpynlip bording bad ngi kular ruh ba ngin sa pyntip sha ki paidbah, hynrei ka don ka jingduna hangne hangtai ha kaba ka khubor kam shym la poi sha ki paidbah” kubur u Conrad.
U Conrad ula kyntu ia ka Meghalaya Energy Corporation Limited (MeECL) bad ka Tnad Bording ba kin pynjanai ia ki lad ai jingtip ban aikhubor sha ki paidbah halor ki jingpynlip bording.
“Nga kwah ban pynshai ba kane ka dei ka kam ba hap ban leh, kan don khyndiat ka jingktah, hynrei la leh ia kane na ka bynta ka jingmyntoi kaba kham heh ban ioh ia ka bording kabym thut hadien habud bad na ka bynta ka jingmyntoi ia ki paidbah bad ka Jylla” ong u Conrad.
 ba T. 900 klur.){kind=link}